Assi: Naalakkersuisut

Qulaarpaa Aningaasanut inatsit piffissakilliorfiusimasoq

Ukioq mannamut aningaasanut inatsisissamut siunnersuut suliarineqarmat piffissakilliortoqarsimavoq, taamaakkaluartorli ukiaru aaqqissuusseqqinnissat akileraarutillu amerlanerit atuutilersinneqarnissaat siunnersuutigineqarpoq.

Nunatta politikeriisa ukioq manna atuakkiani eqqartorneqarnerpaaq, naalakkersuisup saqqummiuppagu, ullumi suliaralugu aallartissavaat, tassalu 2015-imut aningaasanut inatsisissatut siunnersuut.

Allattuata siulimi Vittus Qujaukitsup allallugu aallartitaa allanngortinnagu nangiinnarsimavaa, tamannalu malunnarpoq, aningaasaqarnermut naalakkersuisup nammineerluni saqqummersitseqqaarnini taama nalilerpaa.

- Tassami piffissakilliorsimaqaagut aningaasanut inatsisissamik nutaamik suliaqarnissatsinnut, qaammatialunnguit periarfissarisimagatsigit, taamaammat iluarisimaatupilussuuara taamatut naammassineqarnera, aningaasaqarnermut naalakkersuisoq demokraatineersoq Andreas Uldum oqarpoq.

 

Piffissaqarnerusimagaluarunik immaqa allaanerussagaluarpoq

Aningaasaqarnermut naalakkersuisup siulimi 2015-imut aningaasanut inatsisissatut siunnersuutaa saqqummiunneqarmat unnersiutiginngilaa. Taannaqqinnaarli maanna aningaasaqarnermut naalakkersuisuusup malipajaaginnarsimavaa.

- Oqarsinnaavunga piffissaqarnerusimagaluarutta immaqa tamakkiinerusumik naalakkersuisooqatigiit isumaqatigiissutaannut naapertuunnerusumik suliaqarsimassagaluarpugut, kisianni pissutsit taamaapput, piffissaq piffissaliunneqartoq taanna naapertorlugu iluarisimaarpara uanga angusimasarput, Andreas Uldum oqarpoq.

Aamma atuaruk Naalakkersuisut aningaasaqarneq isigimmassuk GA-p nersualaarpai

Sukaterisoqassasorli erseqqissarpaa, aaqqissuusseqqinnissallu siulliit ukiaru saqqummiutissavai.

- Assigiinngitsorpassuupput, uani upernaakkut ataatsimiinnermi aallarniutigineqassaaq siusinaarluni suliunnaarnermusianut tunngasoq, ukiamut taava utoqqalinermusianut tunngasoq aallartissagigut naatsorsuutigaara, naalakkersuisoq oqarpoq.

 

Sakkortusinnaanera isertuutinngilaa

Piffissap aggersup sakkortusinnaanera naalakkersuisup isertuutinngilaa.

- Aalajangigassagut sakkortussapput kisianni pingaaruteqarput siunissamut kinguaassagullu eqqarsaatigalugit, taamaammat suliassaq qilanaarlunga suliarissuara, aningaasaqarnermut naalakkersuisoq Andreas Uldum KNR-imut oqarpoq.

Aningaasanut inatsisissatut siunnersuut ullumi oqaluuserisassani siulliuvoq, ullumi ataatsimiinneq ataatsinut aallartissaaq.

Isummersuutit


 

Pages