Aningaasanut Inatsisissaq ullumi akuersissutigineqassaaq
Aappaagumut Aningaasanut inatsisissaq, Aningaasaqarnermut Akileraartarnermullu ataatsimiititaliap siulittaasuata tullia Olga P. Berthelsenip nuannaarutigaa, nunali tamakkerlugu akileraartarnerup 11 procentiniit 10 procentinut appartinneqarnissaanut illuatungiliuttut akerliusimanerat unammillernartutut taassuma nalilerpaa.
- Uagut amerlanerussuteqartut toqqagarput taanna ikinnerussuteqartut itigartinniagaat soorunami ataqqivarput itigartinniarmassuk, tamannali soorunami unammillernartuusimavoq, kisianni tassa inissippoq taanna annertunerpaamik immaqa taanna pissutigalugu, Inatsisartut Aningaasaqarnermut Akileraartarnermullu ataatsimiititaliaanni siulittaasup tullia Olga P. Berthelsen, Inuit Ataqatigiinneersoq, taama oqarpoq.
Illoqarfiit sisamaannaat sanaartorfiusussatut Naalakkersuisut Aappaagumut Aningaasanut inatsisissatut siunnersuummi siunnerfigigaluarpaat, Siumukkunniillu tamanna akerlilerneqarluni. Naalakkersuisulli allatut maanna siunnerfeqalernerat Per Berthelsenip, Siumumeersup, nuannaarutigaa.
- Sakkortuumik uparuartugarput tassaavoq Nunatsinni sanaartugassanut atatillugu illoqarfiit sisamat kisiisa sanaartorfissatut isikkoqartillugit saqqummiussaqaraluarnerat, kisianni tassa taanna Aningaasaqarnermut Ataatsimiititaliami naqqiissuteqarfigaarput, siammasinnerusumillu aningaasartuuteqartoqarnissaq massakkut qulakkeerneqarpoq, Inatsisartuni Aningaasaqarnermut Akileraartarnermullu ataatsimiititaliami ilaasortaq, Per Berthelsen, Siumumeersoq, oqarpoq.
Nunali tamakkerlugu akileraartarnerup 11 procentiniit 10 procentinut appartinniarneqarnera Siumup taamaakkaluartoq ajuusaarutigaa.
- Akileraarummik 1 procentimik appaaniarnermi oqartoqaraluarpoq inuiaqatigiinni 72 millionit koruuninik atugassiisoqassasoq, kisianni tassa assigiinngitsut aallerfigineqarput, taakkualu atuisinnaanerigaluat annikillineqarluni. Taamaattumik uagut upperinngliarput 1 procenti taanna aallaavigalugu inuiaqatigiinni aningaasatigut kaaviiaartitsineq uummaarinnerulissasoq, Siumut sinnerlugu Inatsisartunut ilaasortaq Per Berthelsen oqarpoq.
