Aningaasanut inatsisissap kinguaattoornera borgmesterit ernumanartoqartinngilaat
Nuna tamakkerlugu politikerit kommuninut aningaasanik agguaassisarnerat Nunatsinni kommunit tallimaasut pinngitsoorsinnaanngilluinnarpaat, aningaasat tapiissutaasinnaapput imaluunniit suliassanut aalajangersimasunut nuna tamakkerlugu politikkikkut aalajangersakkanut naammassinninniarnissamut atugassiissutaasinnaallutik.
Taamaammat Naalakkersuisut kommunillu isumaqatigiissuteqarput, suliassat suut kommuninit naammassiniarneqassanersut, taamatuttaaq ataatsimoortumik tapiissutit qanoq amerlatigissanersut qanorlu agguaassisoqassanersoq isumaqatigiissutaallutik.
Tamakku ilutigisaannik aamma politikkikkut sulissutigineqarpoq suliassaqarfiit kommuninut, innuttaasunut qanimut sullissiosunut nussorneqartussat pillugit.
AAMMA ATUARUK Aningaasanut inatsisissaq ukiut qulissaat ataannartumik kinguaattoortoq
Assersuutigalugu ineqarnerup kommuninit tamakkiisumik akisussaaffigineqalernissaa, tamatuma saniatigut 2024-ip tungaanut meeqqanik sullissinerup annertusisap ingerlanneqarnissaa kiisalu nunaqarfinni inuussutissarsiutitigut ineriartortitsinermut aningaasaliissutit kommuninit aqunneqartussanngortinneqarlutik.
Aningaasanullu inatsisissap kingumut kinguaattoorutaanera nunatsinni borgmesterinut pingasunut aarlerilersitsinngilaq, taakkumi naatsorsuutigaat isumaqatigiissutit naapertorlugit aningaasanut inatsit naammassineqarumaartoq.
Malik Berthelsen (S): Aningaasaliissutissatut siunnersuutit attanneqarlik
- Neriuutigivara ataatsimoortumik tapiissutissatut isumaqatigiissutissatut siunnersuutiginikuusartik soorunami attatissagaat. Ingammik akissarsianut akinullu qaffakkiartornissanut matussutissatut siunnersuutigineqartoq. Tassanngaaniit appasinnerusumik aningaasaleeriataassagaluarunik, taava soorunami uagutsinnut taanna aningaasanik naleqassaaq.
Qeqqata Kommuniani Borgmesteri Malik Berthelsen (S) taamak oqarpoq. Taassuma borgmestereqataa, Kommune Qeqertalimmi borgmesteri Ane Hansen (IA) Aningaasanut inatsisissap kinguaattoornerata kingunerisaanik aappaagumut pilersaarutit suliassallu aningaasalersorneqarnissaat allanngortiterneqassanngitsut naatsorsuutiginnippoq.
Palle Jerimiassen (Løsgænger): Sanaartugassanik amerlanernik tunissagutsigut takanna
Avannaata Kommuniani borgmesteri Palle Jerimiassen (Attaviitsoq) Malik Berthelsen-itut piumasaqarpoq kommuninut ajorseriaateqartitsisoqassanngitsoq, paarlattuanillu aamma neriuuteqarpoq kinguaattoorneq kommuninut iluaqutissiissasoq:
- Aamma Naalakkersuisut Inatsisartullu kommuninut annertunerusumik tunniussiniarpata, ilaana takanna, tikilluaqquagut, kisianni ajornerulersitsinissaat pissanngitsoq neriuutigilluinnarpara.
Taamak oqarpoq Palle Jerimiassen (Attaviitsoq), taassuma kissaataa tassaavoq sanaartugassanik amerlanerusunik qitiusumit kommuninut tunniussisoqassasoq. Tamannali piviusunngorsinnaassanersoq KNR-imit akissutissarsisinnaanngikkallarparput isumaqatigiinniarnerit suli ingerlammata.
Ataatsimut katillugu nunatta karsianiit 1.7 milliard koruuningajaat 2023-mi kommuninut tunniunneqassasut tagginneqarallaqqavoq.
