Greenland Venture: Aningaasaliissutit atorluarneqassapput
Inuussutissarsiornermut Nukissiuuteqarnermullu Naalakkersuisoq Aqqalu Jerimiassen, danskillu inuussutissarsiornermut ministeriat Rasmus Jarlov Nunatta Danmarkillu akornanni inuussutissarsiornermi suleqatigiinnerup nukittorsarneqarnissaanik tallimanngormat isumaqatigiissuteqarput.
220 millionit koruunit isumaqatigiissut malillugu Greenland Venturemit Danmarkillu Ineriartortitsinermut aningaasaateqarfianit aallarnisaasut isumassarsiaannut nutaanut atorneqartassapput.
AAMMA ATUARUK Nunatsinni inuussutissarsiornermut 220 millionit koruunit
Greenland Venturep pisortaanera Karsten Høy nassuiaavoq, aallarnisaasoq tapiiffigineqassaguni suliniutini suliarilluarsimasariaqaraa:
- Pilersaarutit suliarilluakkat iluatsinnissaminnut ilimanaateqarlutillu pitsaasunik angusaqarsinnaasut annertuut akunnattullu ukkatarissavagut, Karsten Høy tusagassiuutinut nalunaarummi allappoq.
Ineriartortitsinermut aningaasaateqarfiup aamma Greenland Venturep tamarmik immikkut 100 millionit koruuninik Kalaallit Nunaanni suliffeqarfinnut aningaasaliinernut atugassanik pissarsinerat, atsioqatigiinnerup qulakkeerpaa.
Suliniut ataatsimoorluni nalilersorneqartassaaq
Ineriartortitsinermut aningaasaateqarfimmi inuutissarsiornermut siunersortaanerup Hans Jørgen Østegaardip isumaqatigiissut nuannaarutigaa, aningaasallu suleqatigiinnermi avinneqartassanerarlugit.
- Aningaasaliinerit taarsigassarsisitsinerillu annertunerit tamarmik Greenland Holdingimit Ineriartortitsinermullu aningaasaateqarfimmit nalilersorneqartassapput, taamaalilluta tamatta aningaasaliinissamik neqeroorutit avittassagatsigit, Hans Jørgen Østergaard oqarpoq.
AAMMA ATUARUK Inuussutissarsiornermut aningaasaliissutit nunatsinnut Danmarkimullu iluaqutaasussat
Aningaasat sinneruttut 20 milliuunit koruunit suliniutit periarfissaqarluartut ineriartortinneqarneranut atorneqassasut, Karsten Høy nassuiaavoq.
Greenland Venture A/S aningaasaliisarfiuvoq Namminersorlutik Oqartussanik pilersinneqarlunilu Greenland Holding aqqutigalugu pigineqartoq. Piginneqatigiiffiup nammineq aningaasaatai 400 millionit koruunit missaaniipput.