Inuussutissarsiornermut aningaasaliissutit nunatsinnut Danmarkimullu iluaqutaasussat
Danmarkip nunattalu isumaqatigiissutaat Naalagaaffeqatigiinni nunani marlunni inuussutissarsiornikkut suleqatigiinnermut pitsanngorsaaqataassaaq. Tamanna ilutigalugu danskit inuussutissarsiornermut ministeriata, Rasmus Jarlovip, isumaqatigiissut illuatungeriinnut iluaqutissartaqarnerarpaa.
- Kalaallit suliffeqarfiutaat Danmarkimut tunisaqarnerutilersissinnaagutsigit, kalaallit nioqqutissiaannik pitsaasunik iluaqutigisinnaasatsinnillu pissarsissaagut, illuatungaanilu tamanna kalaallit suliffeqarfiutaannut aamma iluaqutaassalluni, Rasmus Jarlov oqarpoq.
Isuamqatigiissuteqartoqarneratigullu danskit naalagaaffiat Greenland Venturemut Vækstfondenimullu 198 millionit koruuninik aningaasaliivoq Namminersorlutik Oqartussallu 22 millionit koruuninik aningaasaliillutik.
AAMMA ATUARUK Nunatsinni inuussutissarsiornermut 220 millionit koruunit
Danskit inuussutissarsiornermut ministeriat naapertorlugu Danmark nunatsinni inuussutissarsiornikkut pitsanngorsaanissamut soqutiginnippoq, inuussutissarsiornikkullu siuarsaanissamut ullumikkut isumaqatigiissutigineqartoq 220 millionit koruuninik aningaasartaqartoq kisiartaassanngilaq.
Rasmus Jarlovimmi erseqqissaatigaa Danmarkimi niuerfimmut ammaanissamut ikiuisoqassasoq, tamatmunngalu peqatigitillugu nunatsinni suliffeqarfiit nunani tamalaani niuerfinnut tunisaqarnissaannut aamma ikiuisoqassasoq.
- Neriuppunga Kalaallit Nunaata Naalagaaffeqatigiit iluanni periarfissat tamaasa atorluassagai. Maanna iliuuserisatsigut, aammali nunani assigiinngitsuni aallartitaqarfiitta inuussutissarsiutitigut nittarsaassinissamut atorluarnerisigut, danskit inuussutissaqarnermut ministeriat oqarpoq.
Danmarkip nunattalu peqatigiillutik nunatsinni inuussutissarsiornikkut pitsanngorsaanissaannik isumaqatigiissutaat Danmarkip mittarfinnut pilersaarutinut aningaasaleeqataanerata ilagaa.