Angutit saassussisimasut tigummigallarneqartut

Angutit marluk Sisimiuni eqqartuussivimmi sapaammi sassartinneqarnerminni tigummigallagassanngortinneqarput, tusagassiorfik allappoq.

Allattoq Nicole Sander Bertelsen

januaarip 15-at 2024 14:53

Nutserisoq Connie Fontain

Angutit marluk Sisimiuni eqqartuussivimmi sapaammi sassartinneqarput – angutip aappaa 19-inik ukiulik politiinit decembarip 23-anili ujaarineqalersoq sapaatini akunnerni sisamani tigummigallagassanngortinneqarpoq.

Sermitsiaq AG ataasinngornermi taama allaaserisaqarpoq.

Angutit marluk 19-inik 20-nillu ukiulik arfininngornermi tigusarineqarput, taakkulu angutit allat pingasut peqatigalugit angummut, 30-t sinnerlugit ukiulimmut tallimanngornerup arfininngornerullu akornanni unnuami kattussillutit saassussisimasutut pasineqarlutik.

Aamma atuaruk Politi: Sisimiuni tigusarineqartut marluk killisiorneqassapput

Angutit Sisimiuni politiit annertuumik suliaqarneratigut tigusarineqarput, Kalaallit Nunaanni Politiillu pigaartuisa pisortaata, Malik Olesenip angutit marluk tigummigallarneqarnissaat anguniarsimallugu KNR-imut oqaatigaa, taassumalu allanik tigusarinnittoqarsinnaanera mattutinngilaa.

19-inik ukiulik decembarip 22-ata 23-atalu akornanni sakkortuumik saassussisimasutut pasineqarluni sapaatini akunnerni pingasuni ujaarineqarsimavoq.

Nutaarsiassami kukkunermik nassaarsimaguit uunga allaffigineqarsinnaavugut.