Politi: Sisimiuni tigusarineqartut marluk killisiorneqassapput
Angutit marluk Sisimiuni eqqartuussivimmi, uuma allaaserisap allanneqarnerani killisiorneqarput.
Angutit marluk kattussilluni angummut 30-it missaannik ukiulimmut arfininngornerup unnuaani saassusseqataasimanertik pillugu pasineqarput.
Taama oqaluttuarpoq Kalaallit Nunaanni politiini pigaartut pisortaat Malik Olesen.
Tigusarineqartunut ilaavoq angut 19-nik ukulik, taanna decemberip ulluisa 23-anni peqqarniitsumik saassusinerata kingorna maanna sapaatit akunnerini pingasungortuni ujaarineqartoq.
Sisamat tigusarineqartut
Angutip 19-nik ukiullip saniatigut angutit pingasut taakkua 20-it missaannik ukioqartut kattussillutik saassussisimanerat pillugu arfininngornermi ualikkut tigusarineqarput.
Angutit marluk iperagaapput, taakkuali saassussisimasutut suli pasineqarput.
Saassussisoqarsimanera pillugu allanik tigusarinnittoqarsinnaasoq Malik Olesenip oqaatigaa.
- Pinerluttoqarsimaneranik paasiniaanerit nanginneqassapput, taanna oqarpoq.
Eqqartuussivimmut sassartitsinerup kingorna tigusarineqartut marluk sapaatit akunnerini sisamani tigummigallagassanngortinneqassasut, politiit piumasaraat.
- Piumasarisarput eqqartuussiviup malissaneraa takussavarput, Malik Olesen oqarpoq
Politiini pigaartup pisortaata, tigusarineqartut marluk persuttaasimanerup saniatigut pisunik allanik pasineqarumaartut naatsorsuutigineqarsinnaanerarpaa.
- Persuttaasimanerit annerusumik ukkatarineqassapput, Malik Olesen oqarpoq.