Politiit ullormut nalunaarutaat: Angutit marluk kiffaanngissusiiaasimasutut eqqartuussivimmut sassartinneqartut
Angutit marluk 30-nik 31-nillu ukiullit angummut 56-inik ukiulimmut kiffaanngissusiiaasimasutut nakuusersimasutullu Tasiilami marlunngormat tigusarineqarput.
56-inik ukiulik sivisuumik kiffaanngissusiiarneqarsimavoq, nakuuserfigineqarsimavoq inuuneranillu navianartorsiortinneqarsimalluni, politiit oqarput.
Angutit taakku marluk politiinit pasineqartut marlunngormat tigusarineqarput eqqartuussivimmullu pingasunngormat sassartinneqarlutik.
31-inik ukiulik sassartinneqareernermi kingorna iperagaavoq, 30-nilli ukiulik suli tigummigallarneqarluni, Kalaallit Nunaanni Politiit sillimasuisa pisortaat Simut Dahl oqarpoq.
-Suliap misissorneqarnera pissutigalugu oqaaseqaqqissinnaanngilanga, sillimasut pisortaat oqarpoq.
Imigassartornerit eqqissiviilliornerillu
Sillimasut pisortaata ulloq imigassamut attuumassuteqartunik pisoqarnerarpaa angerlarsimaffimmilu eqqissiviilliortoqarnerarlugu.
Imigassartorsimatillunilu biilertoq
Angut nal. 00.36 unitsinneqarpoq, imigassamillu uuttuummut anersaartortinneqarami imigassartorsimatilluni biilersimasutut pasineqarpoq.
Angut aaversinneqarpoq tassanilu aava qanoq imigassamik akoqartiginersoq paasineqassammat. Kingornalu iperagaalluni, sillimasut pisortaat oqarpoq.
