Sakkutuujusussaatitaaneq: Angutit arnallu juulip aallaqqaataanit Illersornissaqarfiup Ulluanut aggersarneqartalissasut
Arnat Folketingimi amerlanerussuteqartut aallaqqaammut isumaqatigiissutigisimasaannit siusinnerusukkut sakkutuujusussaatitaanermut aggersarneqassapput.
Københavnimi Illersornissamut ministereqarfik marlunngornermi tusagassiuutinut nalunaaruteqarluni taama paasissutissiivoq.
Danmarkimi arnat sakkutuujusussaatitaalernissaat siuartinneqarpoq, arnat 2025-mi juulip aallaqqaataata kingorna 18-iliisussat taamaalillutik Illersornissaqarfiup Ulluanut 2026-mi pisussamut aamma aggersarneqassallutik.
Aggersarneqartut takkuttussaatitaapput, arnallu sakkutuujusussaatitaanermut angutit naligalugit sakkutuujunissamut naleqqunnersut tassani nalilerneqassallutik.
Sakkutuujusussaatitaaneq angutinut arnanullu danskisut innuttaassuseqartunut, Danmarkimilu aalajangersimasumik najugaqartunut atuuttussaalissaaq, aamma angutinut arnanullu kalaallinut savalimmiormiunullu aamma atuuppoq.
Sakkutuujusussaatitaaneq nunatsinni pisussaaffiunngilaq. Inuusuttulli Illersornissaqarnermi suliaqarusuttut Kangerlussuarmi Issittumi Tunngaviusumik Ilinniarfimmut qinnuteqarsinnaapput.
Partii alla isumaqatigiissummut ilannguttoq
Sakkutuujusussaatitaanerup annertusarnissaanut isumaqatigiissut Folketingimi amerlanerussuteqarluartunit ukioq manna siusinnerusukkut isumaqatigiissutigineqarpoq, taannalu 2027-mi januaarip aallaqqaataanit atuuttussanngortussaalluni.
Sakkutuujusussaatitaanerup annertusinissaanut isumaqatigiissutip ilaani partiit Liberal Alliance aamma Danmarksdemokraterne isumaqatigiissuteqaqataanngikkaluarput.
Isumaqatigiissuteqarnermiilli maanna qaammatit pingasut qaangiuttut Liberal Alliance suiaassutsit akornanni naligiimmik sakkutuujusussaatitaanermut isumaqatigiissummut ilapput, taakkulu aaqqissuussinerup ukioq manna juulip aallaqqaataanut siuartinnissaa aamma akueraat.
Danmarksdemokraatit sakkutuujusussaatitaaneq pillugu isumaqatigiissutip ilaani suli isumaqatigiissuteqaqataanngillat.
Illersornissaqarfimmi ullumikkut sakkutuujusussaatitaasut sisamararterutaat arnaapput, taakkulu namminneq kajumissutsiminnik ilanngussimasuullutik.
Sakkutuujusussaatitaasut eqimattat siulliit augustimi 2026-mi qaammatini aqqanilinni sivisussuseqartumi aallartissasut, Illersornissamut ministereqarfik ilisimatitsivoq.
