Angut toqutsinissamik sioorasaaruteqarsimasutut ulluni 30-ni pineqaatissinneqarsimasunut inissiisarfimmiittussanngortinneqartoq

- Inunnut inuunerannik sioorasaaruteqartoqartussaananilu tamanna akuersaarneqarsinnaanngilaq.

Kalaallit Nunaanni Politiini unnerluussisut pisortaat, Mariam Khalil suliaq toqutsinissamik sioorasaarnermut tunngasoq pillugu oqarpoq.

Suliaq angummut 50-inik ukiulimmut, Eqqartuussisoqarfik Sermersuumi sulisumut eqqartuussisumullu toqutsinissamik oqarasuaatikkut sioorasaaruteqarsimasumut siornalu ulluni 30-ni pineqaatissinneqarsimasunut inissiisarfimmiittussanngortinneqartumut tunngavoq.

Oqarasuaatikkut siorna marsimi oqaloqatigiinnermi angutip ’eqqartuussisumik toqutsisinnaasunik pinerluuteqartartunik attaveqaateqarluni’ eqqartuussivimmi sulisumut sioorasaarutigaa, Kalaallit Nunaanni Politiit tusagassiuutinut nalunaarummi allapput.

Nunatta Eqqartuussisuuneqarfiani taamaatiinnarneqartoq

Angut ulluni 30-ni pineqaatissinneqarsimasunut inissiisarfimmiittussanngortinneqarluni oktobarimi eqqartuunneqarpoq. Taassuma suliaq toqqaannartumik ingerlateqqinneqartussanngortippaa, suliarlu Nunatta Eqqartuussisuuneqarfianit ippassaq suliarineqartussaagaluarluni.

Angulli takkutinngilaq, taamaammat Nunatta Eqqartuussisuuneqarfiata suliap suliarinissaa itigartitsissutigaa. Taamaammat eqqartuussivimmit eqqartuussut atortuutinneqarpoq.

- Inunnut suliffimminnik paarsiinnartunut inuunerannik sioorasaaruteqartoqartussaananilu tamanna akuersaarneqarsinnaanngilaq. Uani pisumi eqqartuussisoq eqqartuussivimmi sulisoq pineqarput. Taamaattumik eqqartuussiviup ulluni 30-ni pineqaatissinneqarsimasunut inissiisarfimmiittussanngortitsinera ullumikkut atuuttussaatinneqarmat naammagisimaarpara, unnerluussisut pisortaat tusagassiuutinut nalunaarummi allappoq.

Angut ulluni 30-ni pineqaatissinneqarsimasunut inissiisarfimmiittussanngortinneqarnermi saniatigut angallannermut inatsimmik unioqqutitsisimasutut 1.000 koruunimik akiligassinneqarpoq.