Politiit ullormut nalunaarutaat: Angut toqungasoq siumorneqartoq – ataaseq tigusaasoq
Marlunngornermi unnukkut nalunaaqutaq arfineq-marlup qaangilaaraa angut utoqqasaaq Alluitsup Paani illup silataani toqungasoq siumorneqarpoq. Illu namminerisaminik illuginngilaa.
Upalungaarsimasut sumiiffimmiittut iluatsinngitsumik angut uummarteqqinniaraluarpaat.
Pisimasoq toqutsisoqarsimaneranik pasitsaassinertut politiit isigaat, angullu ataaseq tigusarineqarsimavoq, Poul Kreutzmann, Kalaallit Nunaanni Politiini pigaartut pisortaat, oqarpoq.
Pigaartut pisortaat nangilluni oqarpoq misissuineq ingerlasoq. Piaarnerpaamillu annertunerusumik paasissutissiisinnaassallutik neriuutigaat.
Seqineq, aasaq ikuallannerlu
Ulloq taanna marlunngornermi siusinnerusukkut - nalunaaqutaq tallimap qeqqa qaangilaaraa - Tunup nunaqarfiani Sermiligaami illua ikuallappoq. Sanaartornermut svejserinermullu atatillugu ikuallattoqarnera ilimagineqarpoq, ikuallannerlu illut quleriit siulliannut siaruaappoq, unnukkulli nalunaaqutaq arfineq-marlup missaani qaminneqarpoq.
Illu garagetut atorneqartoq ajoquserpoq. Inunnilli ajoqusertoqarneranik nalunaartoqanngitsoq, Poul Kreutzmann oqarpoq.
Ulloq taanna aamma Narsami ivikkani ikuallattoqarneranik takunnittoqarsimavoq. Ikuallanneq qummoorortartunik pissuteqarpoq.
Tamatumunnga atatillugu aasaanerani ivikkat panertut ikuallalersinnaanerat pigaartut pisortaata mianersoqqussutigaa:
- Ikuallattoqartillugu ulloq nuannersoq nuanniillisinnaavoq, taanna oqarpoq.
Innermik ikitsissamaartilluni ikuallattoqaratarsinnaaneranut qamitsissutissanik piareersimasunik peqarnissaq qulakkeertariaqartoq, taassuma erseqqissarpaa.
Kalerrisaarut aallartittoortoq
Marlunngornermi aamma Nuummi kalerrisaarut aallartittoorpoq, tassanimi atuarfik USK-imi ullup-qeqqata qaangilaaraa meeqqat ikuallattoqartillugu kalerrisaarummik aallartitsisimammata. Qatserisartut ornigupput, ulorianartorsiortoqannginnerali paasinarsipallappoq. Ikuallattoqartilluguli kalerrisaarutit pinnguaralugit ulorianarsinnaasoq, pigaartut pisortaata naqissuserpaa:
- Taama pisoqartillugu naggataatigut angajoqqaat akiligassinneqarsinnaapput, Poul Kreutzmann oqarpoq.
