Angut qallunaaq coronaviruseqarsorineqartoq tunillanneqarsimanngitsoq
Statens Serum Institutip misissuinerata tamanna takutikkaa, Peqqissutsimut Qullersaqarfiup ilisimatitsissutigaa.
Angut pineqartoq coronavirusimik tunillanneqarsimasutut pasineqarluni Aarhus Universitetshospitalimi ippassaq marlunngornermi immikkut unitsinneqarpoq. Angulli pineqartoq virusimik taassuminnga tunillanneqarsimanngilaq.
- Tunillanneqarsimasorineqarnera aarlerinartortaqanngitsoq misissuinikkut paasivarput, Peqqissutsimut Qullersaqarfik ippassaq taama nalunaaruteqarpoq.
AAMMA ATUARUK Naalakkersuisut: Corona-virusip nunatsinnut anngunnissaa ilimanarpallaanngilaq
Virusilli taassuma Danmarkimi tuniluussinnaaneranut suli aarlerinaateqarpoq.
Napparsimasup coronavirusimik tunillatsimasinnaanera taamaallaat napparsimasup kissarneqarluni tassanngaannartumillu anersaartorniarnermigut ajornartorsiorneranik pissuteqartoq, Statens Serum Institutip paasissutissiissutigaa.
AAMMA ATUARUK Nakorsaaneqarfik nualluut pillugu: Pilersaaruteqarpoq
Tamatuma saniatigut napparsimaneranut takussutissaqalinnginnerani ullut 14-it matuma siorna kinamiut illoqarfissuanni Hubei-ip immikoortortaani, Wuhanimiissimassaaq imaluunniit ullut 14-it kingulliit iluanni nappaammik tunillatsissimasinnaasumik ilagisaqarsimassaaq.
Nualluut corona-virusimeersoq nunatsinni tuniluutilissagaluarpat nunarput piareersimasoq, Nunatta Nakorsaaneqarfiata ippassaq nalunaarutigaa, nualluutilli coronavirusip Nunatsinni tunillaassuunnissaa ilimanarpianngitsoq aamma oqaatigineqarpoq.
