Angut meeqqanut pinngitsaaliilluni kujannissimasutut qarasaasiatigullu persarinninniarsimasutut eqqartuunneqartoq
Angut 30-t aallartinnerannik ukioqartoq, Qaqortumi peqatigiiffilerinermik ilisimaneqartoq meeqqanik pinngitsaaliilluni kujannissimasutut qarasaasiatigullu persarinninniarsimasutut marlunngornermi eqqartuunneqarpoq.
Kalaallit Nunaanni Politiit tusagassiuutinut nalunaarummi allapput.
Angut pillugu unnerluussummi pissutsit arlallit pinngitsaaliilluni kujanninnermut, kinguaassiuutitigut pinngitsaaliinermut aamma kannguttaatsuliornernut tunngasut arlaqartut ilaapput. Ilaatigut niviarsiaqqat marluk 15-it inorlugit ukioqartut ilaapput.
Tamatuma saniatigut unnerluussisussaatitaasut qarasaasiatigut persarinninnermut tunngatillugu unnerluutigisaanni angut 31-nik ukiulik siulliit ilagaat, Kalaallit Nunaanni Politiit unnerluussisussaatitaasuisa pisortaat, Mariam Khalil oqarpoq.
Naapertuilluanngitsuliornerit 2022-mi apriilimi aamma 2024-mi septembarimi pisimapput, angut piffissami kingullermi taaneqartumi tigusarineqartoq, politiit tusagassiuutinut nalunaarummi allapput.
Unnerluussisussaatitaasut angutip ukiut arfineq-marluk ukiullu arfineq-pingasut akornanni pineqaatissinneqarsimasunut inissiisarfimmiittussanngortinneqarnissaa piumasarisimagaat, taassuma KNR-imut oqaatigaa-
- Taamaammat eqqartuussiviup angummut ukiuni arfinilinni qaammatinilu arfinilinni pineqaatissiinera naammagisimaarluinnarpara. Eqqartuussiviup meeqqanut naapertuilluanngitsuliortoqartarneranik ilungersunartuutitsineranut tamanna takutitsivoq. Pingaartumik naapertuilluanngitsuliornerit inummit meeqqanik paarititsinissamut tatiginniffiusumit iliuuserineqarsimatillugit, unnerluussisussaatitaasoq oqarpoq.
Naapertuilluanngitsuliornerit pinerata nalaani angut Qaqortumi peqatigiiffilerinermi suliaqartuunera unnerluussisussaatitaasup innersuussutigaa. Tamannalu Eqqartuussisoqarfik Sermersuup pinerluuteqarnermut ilungersunarnerulersitsisutut aamma isigigaa, politiit tusagassiuutinut nalunaarummi allapput.
Angutip 31-nik ukiulik suliaq Nunatta Eqqartuussisuuneqarfianit suliarineqaqqitassanngortippaa.
