Angut kalaaleq 41-nik ukiulik Danmarkimi tarnikkut napparsimasunut immikkoortortaqarfimmi toqutaasoq
Angut 46-nik ukiulik marlunngornermi unnukkut tigusarineqarpoq angummi 41-nik ukiulimmik toqutsisimasutut pasineqarluni.
Toqutsineq Aarhus Universitetshospitalip kalaallinut tarnikkut napparsimasunut immikkoortortaqarfiani R3-mi pivoq. TV2 Østjylland taama allaaserisaqarpoq.
Pinerlineqartoq savimmik arlaleriarluni kapineqarpoq, tv2 Østjyllandip paasissutissaatai naapertorlugit savik pinerliffimmi nassaarineqarpoq.
Tv2-p allaaserisaa naapertorlugu angutit marluk kalaaliupput, taakkulu tassani inissinneqarsimasuunertik pissutigalugu ilisarisimasariipput.
- Politiit sumiiffimmut apuunneranni angut 41-nik ukiulik nakuuserfigineqarsimasoq uummarsarneqarluni ikiueqqaarfigineqarpoq, annaanneqanngilarli. 41-nik ukiulik kapoorneqarnini pissutigalugit toqusimasutut sumiiffigisaanni nakorsamit nalunaaqutaq 20.08 nalunaarutigineqarpoq. Østjyllandip Politiivi tusagassiuutinut nalunaarummi allapput.
Toqutsisimasutut pasineqartoq ullumi danskit nalunaaqutaat naapertorlugu 14:15 inatsit tunngaviusoq naapertorlugu sassartinneqassaaq, matullu matoqqasuussagunarlutik.
Angut parnaarunneqassaguni Aarhusimi tarnikkut napparsimasunut immikkoortortamut pinerliffigineqartumut utertinneqaqqissinnaavoq, tv2 Østjylland allappoq.
- Eqqartuussisup angut sumiikkuni pitsaanerpaassanersoq aalajangertussaavaa, politiinspektøriugallartoq, Anders Uhrskov tv2 Østjylladimut oqarpoq.