Politiit ullormut nalunaarutaat: Angut ikiaroornartumik timiminiititalittut pasisaalluni tigummigallagaavoq
Angut ikiaroornartumik timiminiititalittut pasineqarluni sisamanngornermi unitsinneqareernermini tigusarineqartoq, Kalaallit Nunaanni Politiit pigaartuisa pisortaat ilisimatitsivoq.
- Angut tigusarineqartoq 50-it 60-illu akornanni ukioqartoq ikiaroornartumik timiminiititaqarunnaarnissaata tungaanut tigummigallarneqarpoq, politiit pigaartuisa pisortaat Aputsiaq Hansen oqarpoq.
Angutip ikiaroornartumik sorlermik qanorlu annertutigisumik timiminiititaqarnersoq politiinit ilisimaneqanngilaq. Taamaammat suliami tassani qanoq pisoqassanersoq, politiit pigaartuisa pisortaata oqaatigisinnaanngilaa.
Inuk kapineqartoq
Sisimiuni angerlarsimaffiit ilaanni paggittoqartoq, politiinut sisamanngornermut unnuaani sisamanut qiteqquteqqammertoq nalunaarutigineqarpoq.
Politiit paggittoqarfiusumut anngukkamik, inuk naamigut kapineqarsimasoq paasinarsivoq. Angut suliamut tassunga tunngatillugu tigusarineqarsimasoq, politiit pigaartuisa pisortaat ilisimatitsivoq.
- Pinerlineqartup qanoq inneranik ilisimatinneqarsiivugut, angullu tigusarineqartoq paasisaqareeriarutta unnerluutigineqarataannaavoq, Aputsiaq Hansen oqarpoq.
Inuit Sisimiuni pisumut attuumassutillit marluusut qassinik ukioqarnersut, politiit pigaartuisa pisortaata ilisimatitsissutiginngilaa inersimasuusulli oqaatigalugu.
