Politiit ullormut nalunaarutaat: Angut hashimik anngiortumik eqqusseriaraluartutut pasisaalluni tigusarineqarpoq
Angut Nuup mittarfiani sapaammi unitsinneqarluni misissorneqarami kuffertia ikiartoornartumik hashimik imaqartoq paasineqartoq, Kalaallit Nunaanni politiit pigaartuisa ittuat ataasinngornermi ullaap tungaani ilisimatitsivoq.
- Mittarfimmi ilanngaaserisut taamaattoqarneranik sapaammi unnukkut arfineq-marlunngulertoq nalunaarfigaatigut, politiit pigaartuisa ittuat Jørgen Madsen oqarpoq.
Politiit hashi nassaarineqartoq arsaarinnissutigiartorlugu mittarfimmut ornigutilertorput. Hashi 370 grammit missaannik oqimaassusilik arsaarinnissutigisimagitsik, politiit pigaartuisa ittuat oqarpoq.
Angut taanna hashimik anngiortumik eqqusseriaraluartutut pasisaalluni tigusarineqartoq iperagaareerpoq. Suliami tassani misissueqqissaareerunik angut taanna pineqaatissinneqarumaartoq, politiit pigaartuisa ittuat oqarpoq.
Ilanngaaserisut misissuitillutik ikiaroornartulisartumik sapaatit akunnerata naanerani aappassaanik unitsitsipput. Angut alla ikiaroornartumik timiminiititalittut pasisaalluni Nuup mittarfiani tallimanngornermi ualikkut unitsinneqareerluni aamma tigusarineqartoq ikiaroornartumik anngiortumik eqqusseriaraluartutut aamma unnerluutigineqarpoq.
Suliamili tassanerpiaq suli misissuigamik tamanna pillugu itinerusumik oqaaseqarsinnaanatik, politiit pigaartuisa ittuat ilisimatitsivoq.