Angut anguteqatiminut pinngitsaaliisimasutut pasisaq pinngitsuutitaavoq
Angut 27-nik ukioqartoq angummik 17-inik ukiulimmik pinngitsaaleeriarsimasutut kanngutaalliorfiginnissimasutullu Sermersuup Eqqartuussiviani pinngitsuutitaavoq.
Kalaallit Nunaata Politiivi eqqartuussisoqareersoq KNR-imut nalunaarput.
Pasisaasoq unnerluussummi allassimasut malillugit, maanna angut 18-inik ukioqartoq, taamani piumaffigisimavaa usuni milutsissagaa, taamaaliornerminilu attualaassagaani arlaleriarluni peqqusimallugu. Taakku saniatigut 18-inik ukiulik nulumigut arlaleriarluni attuualaarneqarsimasoq, unnerluussummi allaqqavoq. .
Sermersuup Eqqartuussiviata angut pinngitsuutikkaa politiit ilisimatitsissutigaat.
Pinngitsuutitsineq unnerluussummi pisimasutut taakkartukkat ataatsimut nalilersorneqareersullu pivoq, eqqartuussiviup uppernarsaateqarsorinngimmagu pinngitsaaliiniartoqarsimanera, politiit KNR-mut mailikkut taama nalunaarput.
- Unnerluussisussaatitaasut soorunami eqqartuussiviup naliliinera tusaatissatut tiguaat eqqarsaatigereerlugulu aalajangerlutik eqqartuussivimmut qulliunerusumik ingerlateqqinneqassanngitsoq, politiit oqarput.
Eqqartuussiviup naliliinera malillugu unnerluussaasoq pinngitsuutinneqarmat suliaq tamaanga killeqarpoq.
