Politiit ullormut nalunaarutaat: Angut aallaasersorsimasutut pasineqarluni tigusaavoq
![](/sites/default/files/styles/image_934x467/public/2023-11/7V9A0249.jpg?itok=5G3RtiTS)
Allaatigisaq una Kalaallit Nunaanni Politiit paasissutisseeqqereerneranni ullaaq manna qulinut qiteqqutilertoq nutarterpoq.
Ittoqqortoormiini angerlarsimaffiit ilaanni eqqissiviilliortoqartoq Ittoqqortoormiini politiit unnuaq marlunut qiteqquteqqammertoq nalunaarfigineqarput. Politiit angerlarsimaffimmut eqqissiviilliorfiusumut ornigutilertoramik aamma ilisimatinneqarput, angut 30-t missaannik ukiulik maangaannaq eqqarsimasoq.
Politiit pigaartuisa ningiuat Anette Ostenfeldt taama oqarpoq.
- Politiit ornigutilertoramik angut aallaasersorsimaneragaasoq eqqissillutik attaveqarfigisareerlugu ajornaquteqanngitsumik tigusaraat, Anette Ostenfeldt oqarpoq.
Angut taanna politiit eqqissiviilliortoqarneranik nalunaarfigineqarneranniit nalunaaquttap akunnerata affaa qaangiuteqqammertoq, tassa unnuaq pingasut qaangeraat tigusaavoq.
Navianartorsiortoqarsimava?
- Angut taanna maanna tigummigallarneqarpoq, qanorlu unnerluutigissanerlutigu paasinialeruttorparput. Tassa aallaasersortoqarnerani navianartorsiortoqarsimanersoq misissuileruttornitsinni nalilersugassatsinnut ilaavoq, Anette Ostenfeldt oqarpoq.
Taamaammat angut taanna suli unnerluutigineqanngilaq, taannali pisumillu ilisimannittullu killisiorneqareerpata unnerluutigissangatikkitsik, politiit pigaartuisa ningiuat oqarpoq.
- Angut taanna akiliisussanngortissanersoq, mianersoqqussummik tunineqassanersoq eqqartuussaassanersorluunniit oqaatigisinnaanngikkallarparput, Anette Ostenfeldt oqarpoq.
Taamaammat pisoq eqqartuussivimmut suliassanngortissanersoq politiit oqaatigisinnaanngikkallarpaat. Taamaaliussanerlutillu, politiit inatsisilerituuisa unnerluussisussaatitaasuusut nalilissavaat.
- Angut taanna tigummigallarneqarpoq, misissuinermilu suliassavut naammassereerutsigit unnerluussaassasoq kingornalu iperagaassasoq naatsorsuutigaarput, Anette Ostenfeldt oqarpoq.