Angut 68-inik ukiulik persuttarneqarsimavoq: Takunnissimasinnaasunik politiit ujarlerput
Sisimiuni angut 68-inik ukioqartoq nunami uppeqqasoq nalunaarutigineqariarmat politiit arfininngornermi septembarip ulluisa 23-anni ullaassakkut ornigupput.
Angut aqqusernit Tuapannguanut Nikkorsuillu naapiffianni nassaarineqarpoq.
Kalaallit Nunaanni Politiit taama tusagassiorfinnut nalunaarput.
Politiit paasivaat, angut sakkortuumik persutagaasimasoq, inummit ataatsimit arlalinnilluunniit taamaaliugaasimalluni. Angut ajoqusersimaqimmat ambulancenik napparsimmaviliaanneqarpoq.
Pisimasup kingorna politiit misissuipput, ilaatigut nakkutiginninnermut atortut videoliat misissorsimallugit aamma takunnissimasinnaasunik apersuillutik, kisianni arlaannaalluunniit maannamut kinguneqanngilaq. Taamaattumik pisimasumik takunnissimasunik arlaatigulluunniit persuttaasimanermut atatillugu nalunnginnittunik nutaanik apersugaqarusupput.
Takunnittuuguit pisumulluunniit tunngasumik ilisimasaqaruit Sisimiuni politiit attavigikkit - oqarasuaammut 701322.
