Ulluni marlunni maqaasineqartoq: Angut 48-nik ukiulik suli ujaarineqartoq
Angut 48-nik ukiulik ulluni kingullerni marlunni maqaasineqartoq sismanngornermut unnuaanili ujaarineqarpoq.
Kalaallit Nunaanni Politiit pigaartuisa pisortaat taama uppernarsaavoq.
Politiit aamma Issittumi Sakkutooqarfiup angut taanna Nuummiit qeqertat akornisigoorluni Maniitsuliassalluni pingasunngormat ullukkut nalunaaqutaq 12:45 aallarsimasoq sisamanngornermut unnuaani ujaarilerpaat.
Angut taanna aallareernermini tutsiutinngimmat ilaqutaasa politiit attavigaat.
Annaassiniartartortatik ujaasinermi ulapputttut nuianerali akornutigillattaaraat, Issittumi Sakkutooqarfik ilisimatitsivoq.
Qulimiguullit politiillu angallataat
Angut taanna qaqortumik SeaStar 6000-mik 150 hk-imillu aquuteralalimmik umiatsiaqarpoq. Umiatsiaata saneraa ROTHO-mik allanneqartoq, Issittumi Sakkutooqarfik Facebookimi nalunaarummini allappoq.
Angallammi ajornartorsiornermik kalerrisaarisoqareertoq aamma Nuup Maniitsullu nalaanniittut ujaarineqartumik alapernaarsoqquneqartut, Issittumi Sakkutooqarfiup nalunaarummini aamma allappoq.
Angut maqaasineqartoq Issittumi Sakkutooqarfiup qulimiguuliutaanik Air Greenlandillu qulimiguuliutaanik EC225-mik ujaarineqarpoq.
Kalaallit Nunaata Politiivisa angallataannik, Ilimmik Nukimmillu, aamma ujaarineqarpoq.
Umiarsuaq alapernaarsuut Knud Rasmussen ujaaseqataasunut aamma ilannguteqqammerpoq.
Innuttaasut maqaasineqartoq pillugu paasissutissallit, Kalaallit Nunaata Politiivinut 701448-mut sianerlutik attaveqaqquneqarput.
