Angut 33-nik ukiulik timmisartorsuarmi naamini ikiaroornartoqarluni toqusoq

Angut 33-nik ukiulik Københavnip Kangerlussuullu akornanni timmisartumut ilaatilluni toqusoq pingasunngornermi nalunaarutigineqarpoq.

Politiit maannamut misissuinerata toqunera aqajaqqumini ikiaroornartoqarneranik pissuteqartoq takutippaa.

Kalaallit Nunaanni Politiit tusagassiuutinut nalunaarummi taama allapput.

- Toqunera pissusissamisoorpasinngimmat angutip toqussutaa paasiniarlugu timaa misissorneqarpoq. Angullu timmiartumut ikinnginnermini timmisartornerminiluunniit iiorarsimasaminik aqajaqqumini annertuumik ikiaroornartuuteqartoq paasineqarpoq.

- Angutip ikiartoortup poortorluarneqarsimannginnera taamaalillunilu timaanut isaasoqarneratigut tamanna toqqutigisimassagaa ilimanarluinnarpoq.

AAMMA ATUARUK Politiit anngiortumik eqqussuineq navianartoq mianersoqqussutigigaat: Akilersinnaanngilaq

Kalaallit Nunaanni Politiit 2022-mi ikiaroornartunik timip iluaniitsitaqartutut, tassa ikiaroornartunik iioraasimasutut taamaalillutillu timiminniititaqarlutik nunatsinnut anngiortumik eqqussisutut pasineqartunik maannamut 23-nik nalunaarsugaqarput.

Ikiaroornartunik anngiortumik eqquissuineq inerteqqutaaginnarani ikiaroornartumik timimut toqqorterineq nammineq inuunermut peqqissutsimullu aamma ulorianarluinnarpoq, taamaammat Kalaallit Nunaanni Politiit ikiaroornartunik allanilluunniit inerteqqutaasunik eqqussuiniarneq sakkortuumik mianersoqqussutigaat.

Ikiaroornartumillu taama eqqussiniarneq inuunermut navianarluinnarsinnaammat tamanna politiit februaarimi aarlerisaarutigaat.