Angut 27-nik ukiulik toqutseriartutut unnerluutigineqartoq
Savimmik kapuineq siorna juulimi pisoq pillugu eqqartuussineq Eqqartuussiveqarfik Sermersuumi ataasinngorpamit suliarineqalissaaq.
Angut 27-nik ukiulik inummut allamut niaquatigut qungasiatigullu arfineq-pingasoriarluni kiisalu pingasunik timaata sinneranut kapisisimasutut unnerluutigineqarpoq.
Tamanna Nuummi Nuussuarmi pivoq.
Pinerliffigineqartoq kapoorneqarnermi kingorna inuunerminik navianartorsiorsimasoq unnerluussummi allassimavoq. Tamanna puami illuatigut kapineqarnermini puaata illuatungaata pullaarneranik ilaatigut pissuteqarpoq.
Perulluliortoqarnera savimmik kapuinermik kinguneqartoq pinerlineqartup unnerluutigineqartumit ikiaroornartumik tigusiniarsimaneranik aallaaveqarpoq.
Unnerluussisussaatitaasut 27-nik ukiulik ukiuni sisamani pineqaatissinneqarsimasunut inissiisarfimmiittussanngortinneqarnissaa piumasaraat.
