Angallannermi inissaqanngimmat inuusuttuaqqat GM-erianngitsoortut

Poorskip nalaa pissartanngorniuffiusaqaaq.

Allaat timersortartut arlariinnik timersuuteqartut timersuut sorleq GM-eqataaffiginiarnerlugu toqqaasariaqartarput.

Nukappiaqqat U-15-it Nagdlúnguameersuq futsalimi Tasiilami pisartanngorniunnissaq ataasinngorpat aallartittussaq toqqarpaat.

Taamaattorli Tasiilamut apuunniarneq tassanngaanniillu aallarniarneq inissikilliorfiummat ukiormanna GM-inngitsuuissulerput. Peqatigiiffiup siulittaasuata tamanna assut pakatsissutigaa.

- Unammisartuutivut arlallit futsalertarlutillu assammik arsartarput. Timersuutini taakkunani pissartanngorniunnerit ataatsikkut pisussaammata toqqaasariaqarnikuupput. Futsalilu toqqarpaat, Nagdlúnguami siulittaasoq Lena Ravn Davidsen oqaluttuarpoq.

Billettit nungoreersut

Aporfissaqarpulli. Tasiilamut billettit tamarmik nungoreerput – taamaasillutik nukappiaqqat Nagdlúnguameersut GM-rtussaajunnaarput.

- Pissutsit pillugit KAK februaarimili ilisimatippara, Lena Ravn Davidsen oqarpoq.

- Tassani aatsaat paasivarput nalunaartut tamarmik GM-eqataassasut. Taamaasippat billettisiniarneq aallartipparput.

Pakatseqaat

- Nukappiaqqat sinnerlugit assorujuk pakatsivunga. Meeqqat inuusuttuaqqallu assut uummateqarfigaakka allaallu sinnarliutigisarlugu neriukkaluarnermut qulliunerusunit arlaatigut iliortoqarsinnaanera, Lena Ravn Davidsen oqarpoq.

- Aamma erseqqissarusuppara avinngarusimasumi GM-ertoqarnissaa ajoriffissaqartinnginnakku. GM-lli sumiinnissaata aalajangiiffiginnginnerani angalanissat qulakkeernissaat KAK-p isumagisimasussaagaluarpaa.

KAK KNR-imut nassuiaavoq peqatigiiffiit siornali ilisimatinneqarsimasut Air Greenlandimut inniminniigallartoqarsinnaasoq. Aamma isumaqatigiissutaasimanerarpaa aningaasartuutitaqanngitsumik billettit utertinneqarsinnaasut.

- Air Greenland aamma ilisimatereernikuuarput Kulusumiit Tasiilamut angalaniarnermi inissat ikippallaartut, ajoraluartumilli Air Greenlandimiit tamanna qisuariarfigineqanngilaq, KAK-mi siulittaasoq Benjamin Kielsen oqarpoq.

Taamaattooq nuannaarutiginerarpaa siullermeerutaasumik Nunatta kangiani GM-rtoqartussanngormat.

- Tassami unammersuarnerit meeqqanut arsarneq ajortunut aamma arsarusulersitsisarmata kajumissutsimillu annertuumik innuttaasunut tunisisarmat, Benjamin Kielsen oqarpoq.

Arsaannermi GM-rtoqartarnerani peqatigiiffiit nammineq billettit isumagisarpaat timersuutini allani kattuffiit billettinik isumaginnittuusartut.