Angajoqqaat Ivaaqqamiittuutillit: Meeqqagut naammattumik misissorneqarnersut naluarput
![](/sites/default/files/styles/image_934x467/public/ivaaraq.jpg?itok=fxrE48jS)
Arnaq 23-nik ukiulik, annertuumik innarluutilik naartusimasoq ilisimaneqarani septembarimi ernivoq.
Arnaq ulloq unnuarlu angerlarsimaffimmi Qaqortumi Ivaaqqami najugaqartuuvoq. Politiit suliaq pinngitsaaliisoqarneratut misissuiffigaat, angullu 62-inik ukiulik novembarip aallaqqaataani tigusarineqarlunilu ulluni 22-ni tigummigallagassanngortinneqarpoq.
AAMMA ATUARUK Politiit Ivaaqqami suliaq pillugu: Paasiniaaneq sivisussaaq
Politiit oqarnerat naapertorlugu taassuma pinngitsaaliilluni atoqateqarsimanini nassuerutigaa.
Suliaq naatsumik
23-nik ukiulik, annertuumik innarluuteqartoq septembarip aappaani ernertaavoq, taassuma naartunera kimilluunniit ilisimaneqanngilaq.
Arnaq oqalussinnaanngilaq, paarnguinnarsinnaallunilu nangeqartuuvoq.
Qaqortumi Politiit Ivaaqqami kinguaassiutitigut atornerluisoqarsimanera pillugu nalunaarfigineqarsimallutik erngertumik uppernarsarpaat.
Meeqqanut, inuusuttunut, ilaqutariinnut peqqissutsimullu naalakkersuisup, Mimi Karlsenip (IA) nuna tamakkerlugu ulloq unnuarlu paaqqinniffimmi pissutsinik misissuisoqarnissaa aallartippaa. Paaqqinniffimmi inatsisit malinneqarnersut misissorneqassapput.
Tiliup aamma Inuit pisinnaatitaaffii pillugit Siunnersuisoqatigiit suliamut atatillugu isornartorsiuingaatsiarput, Inuit Pisinnaatitaaffii pillugit Siunnersuisoqatigiit unioqqutitsineq inuit pisinnaatitaaffiinik unioqqutitsinerunerarpaa.
Isumaginninnermut aqutsisoqarfik suliap saqqummerneranit ullualuit qaangiuttut Qaqortumukarluni sulisut Ivaaqqamilu aqutsisut peqatigalugit suliamik misissuivoq.
Ernisoqarnerani ullualuit qaangiuttut Ivaaqqami najugaqartut arlallit naapertuilluanngitsuliorfigineqarsimanersut misissorneqarput. Tamakkerlugilli misissorneqanngillat. Taamaammat angajoqqaat meeqqatik aamma naapertuilluanngitsuliorfigineqarsimasinnaanerat maanna ernumassutigaat.
- Ilisimaannarparput Ivaaqqami najugaqartunut arnanut naartunermut misissuummik atuillutik misissuisimasut. Paasitinneqanngilavullu itinerusumik allatulluunniit qitornavut misissorluarneqarnersut. Tarnikkut eqqisserusoqaavut qularnaatsumillu paasitinneqarluta ilumut qitornavut kinguaassiutimikkut atornerlunneqarsimannginnerat qulakkeerumallugu, angajoqqaaqatigiit Ivaaqqami najugaqartuutillit tusagassiuutinut nalunaarummi oqarput.
Naalakkersuisoq: Arlalinnik sukaterisoqarpoq
Ivaaqqami najugaqarfiit marluupput, tassa sungaartoq tungujortorlu. Angajoqqaalli immikkoortup aappaannaani tassa arnap 23-nik ukiullip najugaqarfigisaaniittuutillik kisimik ikiorneqarnissamik neqeroorfigineqarsimasut tusagassiuutinut nalunaarummi allapput.
- Angajoqqaaqatigiiusugut apeqquserparput sooq uagut misissuinermut ilanngunneqarsimannginnersugut, angajoqqaaqatigiit tusagassiuutinut nalunaarummi allapput.
AAMMA ATUARUK Innarluutilimmut anaanaasoq: Eqqissisinnaanngorpunga
Meeqqanut, Inuusuttunut Ilaqutariinnullu naalakkersuisup, Mimi Karlsenip (IA) oqarnera naapertorlugu arlalinnik sukaterisoqareerpoq.
- Meeqqanut, inuusuttunut innarluutilinnullu angerlarsimaffiit sukateriffigineqarput. Ingerlatseriaatsit misissorneqarput, ilaatigut sulisut marluujuaannarnissaat piumasaqaatigivara. Pisoq ilungersunarluinnarpoq neriorsuutigissavaralu meeqqanut, inuusuttunut innarluutilinnullu angerlarsimaffiit ukkatarineqassammata, Mimi Karlsen 62-inik ukiullip tigusarineqarnerata aqaguani oqarpoq.
Piumasaqaatit arfineq-marluk
Angajoqqaaqatigiilli meeqqanik qanigisaminnillu Ivaaqqamiittuutillit ulloq unnuarlu angerlarsimaffiittunut pissutsit pitsanngorsarnissanut allattuipput:
1. Ivaaraq angerlarsimaffiuvoq angisooq, perorsaasutut ilinniarsimasut Qaqortumi naammanngillat, pitsaanerussaaq Ivaaraq immikkoortortaqarfilersorlugu sineriammut aggulukkaanni.
2. Najukkami avatagiisit sinaakkutillu najugaqartunut pitsaasuusariaqarput. Ivaaraq angerlarsimaffippalaanngilaq, pitsanngorsarneqartariaqarpoq. Soorlu kiassanermut tunngasunik ajornartorsiuteqarpoq.
3. Ulloq unnuarlu angerlarsimaffiit pitsaanerusumik sakkortusisamillu nakkutigineqartariaqarput. Najugaqartut nammineersinnaassusiiagaasimasut angajoqqaartut akisussaasui angerlarsimaffinni pisunut malinnaatinneqartariaqarput, nakkutilliisup aamma pulaarnerani. Nakkutilliisussaatitaasut angajoqqaatut akisussaassusilinnut attaveqartassaaq, tassami najugaqartut namminneq oqarsinnaanatillu isummersinnaanngillat. Angajoqqaatut akisussaassuseqartutut nakkutilliineq apeqquserparput, tassami inunnut annertuumik innarluutilinnut naammattunik ilisimasaqarnersut, soorlu aamma nammineersinnaasusiiagaanerannut kiisalu angajoqqaatut akisusaassuseqartunut tunngasunik aamma.
4. Siunnersortit terapeutillu amerlanerit sineriammi naliliisinnaasariaqarput ikiuutit pisariaqartinneqartut qulakkeerniarlugit, sungiusaanerit aamma ingerlatitsinerit soorlu pillorissaaneq aamma timimik suniusaasut amerlanerit. Siunnersortit tamanut atuuttariaqarput (meeqqanut aamma inersimasunut), innuttaasumut ilungersunartitaanut akimmiffiinullu siunnersuillutik ikiuisinnaasut. Siunnersortit ilinniarsimasunut, inunnut innarluutilinnut qanigisaannullu atuuttariaqarput.
5. Sulisut akisussaaffiinik nalunaarsuinerit, nalunaarsuivimmi sulisut qanoq najugaqartumut akisussaanersut takuneqarsinnaasariaqarpoq. Soorlu iisartakkanut, kina uffaasarnersoq, unnuarsiortut najugaqartunut nakkutilliisut aamma qaqugukkut pisarnersut. Taamatullu nalunaarsuivinnut atortunik pisiortortoqartariaqarpoq.
6. Ulloq unnuarlu angerlarsimaffinni sulisut amerlassusisssaanut akuerisat amerlanerusariaqarput. Maanna Ivaaqqami sulisukippalalarpoq ulluinnarni suliassat naammasiniassallugit. Taamaalillutik sulisut tunngaviusumik pisariaqartinneqartunuinnaq naammassinnissinnaasarput, soorlu nerisitsinerit, nanginik taarsersuinerit aamma sinitsitsinerit. Angalanernut, sammisaqarnernut sungiusarernullu allarpassuarnullu piffissaqartoqanngilaq.
7. Arnanut najugaqartunut angutit unnuarsiortinneqassanngillat.
KNR Ivaaqqamit oqaaseqartitsiniarsarigaluarpoq, tamannali iluatsinngilaq. Ulloq unnuarlu angerlarsimaffiup Isumaginninnermik aqutsisoqarfik innersuussutigaa. Isumaginninnermik aqutsisoqarfiup isornartorsiuineq aqagu ullaap tungaani aatsaat akissuteqarfiginiaraa, pisortap, Helene Berthelsenip nalunaarutigaa.