Politiit Ivaaqqami suliaq pillugu: Paasiniaaneq sivisussaaq
qaqortumi politiit Arnap inuusuttup annertuumik innarluutillip 23-nik ukiullip, innarluutillit angerlarsimaffianni Ivaaqqami Qaqortumiittumi najugallip, ernineranut tunngasumik misissuileruttorput.
Arnap naartunera arajutsineqarsimalluni septembarip ulluisa aappaanni ernertaarpoq. Taanna Innarluutillit angerlarsimaffianni Ivaaqqami najugaqarpoq,
kinguaassiutitigut atornerluisoqarsimaneranik politiinut nalunaarutiginnittoqarsimasoq, Qaqortumi politiit KNR-imut ullualuit tamatuma kingorna uppernarsarpaat.
Paasiniaaneq suli naammasseqqajanngitsoq, Qaqortumi politikommissæri, Søren Hansen oqarpoq.
Pisoq pillugu:
23-nik ukiulik annertuumik innarluutillip naartunera ilisimaneqarnani ernertaarpoq.
Arnaq oqalussinnaanngilaq, arnarlu paarnguttuullunilu nanginik atugaqartuuvoq.
Innarluutillit angerlarsimaffianni najugalimmik kinguaassiutitigut atornerluisoqarsimaneranik politiinut nalunaaruteqartoqarpoq.
Meeqqanut, Inuusuttunut Ilaqutariinnut, Peqqissutsimullu naalakkersuisup Mimi Karlsenip (IA) Ivaaqqami pisoq aallaavigalugu nunatsinni tamarmi ulloq unnuarlu angerlarsimaffinni misissuisoqarnissaanik aallartitsilluni KNR-imut septembarip tallimaanni oqaatigaa.
Isumaginninnermut Aqutsisoqarfik Qaqortumukarluni Ivaaqqami sulisunik aqutsisunillu oqaloqatiginnikkiartorpoq.
Angajoqqallu ilaat Qaqortumukarlutik pisumut malinnaatinneqarput,
Tigusarinnippisi?
- Tamanna pillugu oqaaseqarsinnaanngilanga.
Inuit qassit killisiorpisigit?
- Tamanna pillugu oqaaseqarsinnaanngilanga. Paasiniaaneq sivisussaaq, paasiniaanerup nalaani suliat allat aamma saqqummeriataarsinnaammata, Søren Hansen KNR-imut oqarpoq.
KNR pisoq pillugu septembarip tallimaanni nutaarsiasseeqqaarpoq. Kingorna inuiaqatigiinni assigiinngitsunit, oqartussanit, suliffeqarfinniillu isornartorsiuinerit imaaginnavipput.
Ivaaqqamilu najugallit suliamut tunngatillugu tamarmik misissorneqassasut aamma Meeqqanut, Inuusuttunut, Ilaqutariinnut Peqqissutsimullu naalakkersuisoq, Mimi Karlsen (IA), taamani oqarpoq.
Kingorna angajoqqaat ilaata, Laura Taunajik Uitsatikitsip, panimmi siullersaalluni misissorneqarsimanera uppernarsarpaa. Taanna atornerlunneqarsimaneranik ersiuteqanngilaq.
politiit Suliamut tunngatillugu allamik oqaaseqanngillat.
- Kalaallit Nunaanni politiit Ivaaqqami kinguaassiutitigut atornerluisoqarsimasoq nalunaarfigineqarsimallutik uppernarsarpaat, tamannalu pillugu maanna paasiniaaleruttorput.
- Meeqqanut, Inuusuttunut Ilaqutariinnut, Peqqissutsimullu naalakkersuisup Mimi Karlsenip (IA) Ivaaqqami pisoq aallaavigalugu nunatsinni tamarmi ulloq unnuarlu angerlarsimaffinni misissuisoqarnissaanik aallartitsilluni KNR-imut septembarip tallimaanni oqaatigaa.
- Tilioq Inuillu pisinnaatitaaffii pillugit suliniaqatigiiffik pisoq pillugu isornartorsiuingaatsiarput, Inuit pisinnaatitaaffii pillugit suliniaqatigiiffiup tamanna inuit pisinnaatitaaffiinik unioqqutitsioqarfiusoq ilaatigut oqaatigaa.
