Angajoqqaat coronamut ernumapput: Meeqqagut atuariartortinnianngilagut
Nuummi coronavirusimik tunillatsissimasoq ataaseq paasineqarpoq. Taanna angalanermini tunillanneqarsimasoq ataasinngornermi tusagassiortunik katersortitsinermi oqaatigineqarpoq.
Nunatsinnili inuiaqatigiinnut coronavirus suli tuniluutinngitoq nunatsinni nakorsaaneq ilisimatitsivoq. Tunillatsissimasoq ilaquttani ilagalugit aneqqusaanngimmat, atuarfinnik meeqqerivinnillu matooraaniaratik naalakkersuisut ilisimatitsipput.
Taamaakkaluartoq Nuummi Atuarfik Hans Lyngemi atuartitsiviit ulikkaaqqasaraluartut ulluni makkunani inoqanngingajattarput.
AAMMA ATUARUK Angerlarsimaffimmi mattussaaqqaneq? Ima iliussaatit
Ilulissani Nuummilu atuarfiit ilaanni atuartut affaannaat Ippassaq atuariartorsimasut atuarfeqarfiit ilisimatitsipput.
Tamannalu coronavirusimik ernumassuteqarnermik peqquteqartoq atuarfeqarfiit ilisimatitsipput.
Meeqqakka akisussaaffigaakka
Qupanuk Olsen Nuummi Atuarfik Hans Lyngemi 1. klassemi atuartuuteqarpoq, meeqqerivinniittartunillu meeraqarluni, taanna meeqqani angerlarsimatiinnarniarlugit aalajangerpoq.
- Ulluni makkunani angerlarsimatippakka, sisamanngormat tallimanngormallu aamma meeqqanukarnatillu atuarfilianngillat . Covid19-ip siaruaannissaanut pinaveersaartitseqataaniarluta, taanna oqarpoq.
AAMMA ATUARUK Tamaat isigalugu: Coronavirus pillugu killiffik
- Uanga inuttut nammineq pitsaanerpaasoritikkakku, naggataatigut uanga nammineq meeqqakka akisussaaffiginerpaagakkit, taava uanga misigisimagama pitsaanerpaajussasoq angerlasimatiinnassallugit, taamaammat angerlarsimatiinnarpakka.
Jessica Kristensen meeqqanilu sisamat angerlarsimaannartut.
Ilulissani Atuarfik Mathias Storchimi atuartuutillit ilaasa meeqqatik ulluni makkunani atuariartortinniarnagit aamma aalajangersimapput.
Tassani atuartut katillugit 320-upput, ippassarli ataasinngornermi atuartut 162-iinnaat atuartoriartorsimapput.
Meeqqat napparsimasut angerlarsimatiinnarneqartut
Jessica Kristensen sisamanik meeraqarpoq, meeraasalu ilaat Mathias Storchimi atuartarpoq, taannali angerlasimatiinnarneqartoq anaanaa oqalutuarpoq.
- Ullut 17-isssaat massakkut atuangitsooqattaartipparput. Napparsimanikuummata taavalu massakkut tusaamallutigu, coronavirusi pillugu atuartitsinnginniarrattut.
- Taava uagut ataataallu eqqartorsimavarput pingaartillugu angerlarsimatinnissaat, nualluummut allamut tunillatsinnginnissaat piniarlugu, Ilulissani Atuarfik Mathias Storchimi atuartuutilik, Jessica Kristensen taama oqarpoq.
AAMMA ATUARUK Nunatsinni inuk ataaseq coronavirusimik tunillatsissimasoq
Nunattali nakorsaanerata Henrik L. Hansenip oqarnera naapertorlugu nunatsinni atuarfinnik meeqqerivinnillu matoqqatitsinissaq pisariaqanngilaq.
- Maannamut inuk ataasiinnaq coronavirusimik tunillatsissimavoq, taamaammallu inassutit allannguuteqannginerat erseqqissaatigissavara.
Coronavirus nunatasinni inuit akornanni tunisllaasuutinngitsoq, nunatta nakorsaanerata aamma eqqaasitsissutigaa:
- Taamaammallu paaqqinnittarfinni atuarfinnilu mattussinissamik maannangaaq pilersaaruteqanngilagut.
