MIO: Angajoqqaat akisussaanerpaajuaannarput
Meeqqat Illersuisuata MIO-llu Qeqqata Kommuniani angalanerminnit nalunaarusiartik ataasinngormat saqqummiuppaat.
Kommunit meeqqanut kigaatsumik sullissisarnerat, angajoqqaat inersimasullu ilaasa sumiginnaasarnerat, nakuusertarnerat atornerluisarnerallu MIO-p siornatigut nalunaarusiaani allaaserineqartarput. Qeqqata Kommunianullu nalunaarusiami taamatuttaaq allaaserinnittoqarpoq.
AAMMA ATUARUK Qeqqata meerartai hashimik atornerluinermit eqqugaaqqasut
Angajoqqaat ilaat meeqqaminnut akisussaanerminnik naammassinnissinnaanngitsut nalunaarusiami ilaatigut allaaserineqarpoq, ilaatigut assersuutigineqarlutik, meeqqat iluamik nerineq ajortut, meeqqat qatanngutiminnik paarsisariaqarlutik atuanngitsoortartut meeqqallu hashimik atornerluisut.
- Angajoqqaat akisussaanerpaajuaannarput. Kisianni angajoqqaat arlaatigut peqquteqarlutik pisinnaatinnagit, meeqqat pitsaasumik inuunermik tunisinnaanngikkunikkit, tassaniuvoq pisortat ikiuunnerat pulasussaasoq, Meeqqat Illersuisuat, Aviâja Egede Lynge taama oqarpoq.
Angajoqqaalli ajornartorsiortut kommunimit naammattumik ikorfartorneqarsinnaanngillat.
MIO nalunaarusiamini kommunimut kajumissaaruteqarpoq, meeqqalli atugaannik pitsaanerulersitsiniarneq pillugu oqallinnermi sulinermilu angajoqqaat peqataatinneqartariaqartut, Aviâja Egede Lynge isumaqarpoq.
AAMMA ATUARUK MIO-p nalunaarusiaa nikallornartortaqarpoq
Angajoqqaallu peqataatinniarlugit, kommuni MIO-lu innuttaasunik ataatsimiisitsinernut assingusunik ataatsimiisitsisarniarput.
Taakkunanilu nalunaarusiaq meeqqat inuunertik pillugit oqaluttuarnerannik imalik saqqummiunneqartassaaq.
- Isumaqarpunga nuannaarutigalugulu meeqqat oqariartuutaannik innuttaasunut taamatut apuussineq peqataatitsinerlu nassuerutiginninnermik, paasititsiniaanermik kaammattuinermillu imaqarsinnaasoq, kisianni aamma akisussaaffimmik tigusinissamut taavalu aqqutissanik ujarlernissamut periarfissatsialaavoq pingaaruteqartupilussuusoq, Meeqqat Illersuisuat, Aviâja Egede Lynge taama oqarpoq.
AAMMA ATUARUK MIO-p tikeraarnera Qeqqata Kommunianut 49-nik nalunaaruteqartitsisoq
