- Ministerip isumaqataaffiginngisaminik kommunini pisoqarnera unitsinniaruniuk inatsit allanngorteqqaartariaqarpaa.

Danmarkimi tusagassiornermik ilinniarfimmi (Danmarks Medie- og Journalisthøjskole) ilisimatusarnermi lektorip aqutsisuusullu Roger Buchip akissutaa taama ersaritsigalunilu nalornerpalunngitsigaaq.

Danskit isumaginninnermut ministeriat Sophie Hæstorp Andersen (Socialdemokraterne) qallunaat kommuniinut qanoq pissaaneqartigineranik apeqqut, taassuma aamma meeqqanut ilinniartitaanermullu naalakkersuisoq Aqqaluaq B. Egede (IA) novembarip 15-iani ataatsimiinnerisa kingorna soqutiginarsivoq.

Tassami ataatsimiinnermi qanoq oqartoqarsimanersoq ataatsimeeqataasut pingaarnerit isumaqatigiinngillat.

Kalaallit angajoqqaat misissorneqartarneri isornartorsiorneqangaatsiartut qallunaat ministeriata unitsinniarlugit neriorsuuteqartoq, Aqqaluaq B. Egede isumaqarpoq.

Taamaammat tusagassiutinut ima qulanngitsigisumik nalunaarasuarpoq; “Danskit Isumaginninnermut Ineqarnermullu Naalakkersuisuata ataatsimeeqatigereernerata kingorna, neriorsorpaanga – Danmarkimi kommuninut allakkianik nassiussuisoqassasoq, kalaallit ilaqutariit akornanni  taamak misissuisarnerit unitsinneqarnissaannik oqariartuutitalimmik.” 

Ministerilli allagaani misissuinerit unitsinneqarnissaannik kommuninut allaqqasoqanngilluinnarpoq. Ministerili allakkamini ima oaasertaliivoq: (…) atorneqarnerisa unitsinneqarnissaat kaammattuutigerusuppara.

Taakkualu oqaasii assigiinngigisassaarpiarpasinngikkaluartut oqaasertaliineri assigiinngilluinnarput. Ministerimi kommuninut angajoqqaanik misissuinernik unitsitseqqusissaguni inatsimmik unioqqutitsivissussaaq.  

Aarhusip Universitetiani juraprofessori meeqqanik ikiortarialinnik immikkut sammisaqartuusoq, Ilisimatusarfimmilu inatsisilerituunngornianut inuunermi atukkat pillugit inatrsisilerinermik ilinniartitsisuusoq, Caroline Adolphsen oqarpoq.

- Ministerimmi suleriaatsit allannguinnarsinnaanngilai. Misissuinerit taakku unitsinneqarnissannik kommunit pisusssaaffilerneqassappata inatsit allanngorneqartariaqarpoq, taanna oqarpoq.

Ministerip oqaasii inatsisaanngillat

Tassalu Sophie Hæstorp Andersen kalaallinut angajoqqaanut misissuutit atorunnaarnissaannik naalakkersuisunut neriorsuisimaguni, eqquutsissinnaanngikkallakkaminik neriorsuisimavoq.

- Kommunit inatsit malillugu ingerlatillutik suliamik qanoq nammassinissaat namminneq aalajangissavaat. Ministeri kommuninut naalakkiisinnaanngilaq. Isummani annissinnaavaa taakkulu naleqqussaannartariaqassapput, Caroline Adolphsen oqarpoq.
 

Aqqaluaq B. Egedellumi allagaq aamma naammagisimaanngilaa.

- Danskit ministeriata neriorsorsimagunitigut neriorsuutimi eqqortuutinnissaa akisussaaffigaa. Kaammattuutaannaasimaneraanermut isumaqataanngilanga. Ministeri taamatut suleriaaseqarneq atorunnaarsinniarlugu neriorsuinikuuvoq, taanna KNR-mut oqarpoq.

Taama oqarnera Sophie Hæstorp Andersenimut erloqinartorsiortitsivoq. Inatsit allanngortikkusussimanngikkuniummi, kommuninut kimigiisernerusinnaavoq, taakkununnga inissiisarnermut suliani qanoq iliuuseqartassanerlutik najoqqutassatut ilitsersuutit oqaasertaannut sukannernerulersitsilluni.

- Kommunini misissuutit atorneqartut, ministereqarfiup atorneqanngilluinnarnissaannik inassutaa ilitsersuutini allanneqarsinnaavoq. Ersarissaataassaaq imaanngitsoq atornissaat unioqqutitsinerulissasoq, Caroline Adolphsen oqarpoq. 

Ilitsersuutini allannguineq kommunit suleriaatsiminnik allannguinerannik qulakkeerinnittuunavianngilaq.

Inatsisinik atuilluni akuliunneq sakkortusarpoq

Inatsimmik allannguinissamut qallunaat naalakkersuisui Folketingimi tapersersortissaqarluarput. Naalakkersuisummi inatsisiliassatut siunnersuutitik ajornanngitsumik amerlanerussusertissinnaagaat, Roger Buch oqarpoq.

Ministerillu taamaaliorsimannginneranut kommunit eqqortunik, suliallu qanoq ittuussusianik sulianillu ilisimasaqarnermut tunngaveqartunik, aalajangisinnaanerannik qularinnilernaveersaarnermik peqquteqarsinnaasoq  Roger Buch oqarpoq.    

- Angajoqqaanik misissuisarneq atoqqusaajunnaarsillugu inatsisiliortoqaraluarpat, ministeri sakkortuuliussagaluarpoq. Kommunimmi ilaasa ajunngitsumik atorsimarataannaavaat, taanna oqarpoq.

Misissuutit kalaallinut angajoqqaanut atorneqartaannassanersut kommunit nalilersueqqissaartariaqartut, isumaginninnermut ministerip allagaani pisussaaffiliisoq taanna erseqqissaavoq.

IA-meersup Aaja Chemnitzip aamma Siumumeersup Aki-Matilda Høegh-Damip isumaginninnermut ministeri angajoqqaanik misissuisarneq isornartorsiorneqangaatsiartoq pillugu siunersioqatiseraat.