Ane Lone Bagger naalakkersuisunit tunuartoq
Ane Lone Bagger (S) nammineq kissaatigisaa aallaavigalugu Naalakkersuisunit tunuarpoq.
- Tunuarnissamik aalajangerniarnera oqimaassimaqaaq, taamaattorli peqqinnissara ilaquttakkalu salliutinniarlugit aalajangerpunga, Ane Lone Bagger oqarpoq.
Ane Lone Bagger uippakajaarnini pissutigalugu marsip qaammataani ulluni 14-ini sulinngiffeqarallarsimavoq. Tamatumali kingorna naalakkersuisut uteqqippoq - uteqqinnerali tamaannga killeqarpoq.
Naalakkersuisutut ivertinneqarninnut tatigineqarnera qujassutigerusuppara politikikkullu suleqatigisimasakka aamma qujaffigerusuppakka, Ane Lone Bagger tusagassiuutinut nalunaarummi oqarpoq.
- Minnerunngitsumik sulisut suleqatigisimasakka tamarluinnaasa qamannga pisumik qutsavigerusuppakka, ilinniartitaanermut, kultureqarnermut ilageeqarnermullu maanna naalakkersuisuusimasoq oqarpoq.
AAMMA ATUARUK Ane Lone Bagger uippakajaarnermik uninngareerluni: Nammineerlunga maluginngikkaluarpara
Ane Lone Bagger 2018-imi oktobarip tallimannili naalakkersuisuulerpoq.
Siulittaasup, Kim Kielsenip (S) Ane Lone Baggerip tunuarniuteqarnera uggoraa:
- Ataqqivara Ane Lonep peqqinnissani ilaquttanilu pillugit tunuarniuteqarluni aalajangiinera, naak naalakkersuisutut suleqatigiunnaarnissaa assut uggorigaluarlugu. Ane Lone-mut oqarusuppunga qamannga pisumik qujanaq sullissilluarsimanernut, aammalu siunissami ajunnginnerpaanik kissaappakkit.
Ilinnairtitaanermut, kultureqarnermut ilageeqarnermullu naalakkersuisoqarfik ineqarnermut attaveqaqatigiinnermullu naalakkersuisumit Karl Frederik Danielsenimit akisussaaffigineqarallassaaq.