Qaasuitsoq Kujalleq Ane Hansen siulittaasunngortoq
Qaasuitsoq Kujallermi kommunalbestyrelsimi ikaarsaariarnermi ataatsimiititaliaq arfininngormat ataatsimiippoq. Taamaalilluni Qaasuitsoq Kujallermi Ane Hansen pisortatigoortumik Ikaarsaariarnermi ataatsimiititaliami siulittaasunngorpoq, taamatullu ukiortaamit borgmesterinngortussanngorluni.
Kommunalbestyrelsinngortussaq inissitsiterluni Aasianni katersortarfimmi ataatsimeerngaarpoq.
- Siumut Inuit Ataqatigiillu pitsaasumik isumaqatigiissuteqarput. Nuannaarutigaaralu Atassutip isumaqatigiissut tapersermagu, uangalu siulittaasussatut borgmesterinngortussatut taaneqarlunga. Taamallilluta kommuninngortussami siammasissumik suleqatigiinnissaagut, Ane Hansen oqarpoq.
Kommuniulersussami allaffissornikkut ingerlatsinermi naqqanit pisariillisaasoqarlunilu kalaallinut tulluarsaasoqassasoq Ane Hansenip oqaatigaa.
Otto Jeremiassen Siumumeersoq siulittaasup tullerissavaa Hans Aronsenilu siulittaasup tulliata aapparissallugu.
