Ane Hansen: Naaguna Qaasuitsup kommunalbestyrelsitaava?
- Apriilip aappaani kommunalbestyrelsimut qinigaagatta sulinissatsinnut pilereqaagut, qinersinermilu partii amerlanerussuteqartoq suleqatigiissinnaanermik siunertalimmik isumasiorneqarluta saaffigineqaratta unneqarilluta ukiuni tulliuttuni anguniagassani suut pingaarnerpaatinnerlutigit nalunarfigaagut tamatumalu kingorna tusarfigeqqinnagit, Ane Hansen tusagassiorfinnut nalunaarummi allappoq.
- Tusagassiutit aqqutigalugit paasivarput Siumut Atassullu suleqatigiinnissamik siunniussaqartut, tamanna ajungilaq. Qaasuitsup Kommunalbestyrelsiani sulinissarput siunertaralugu qinigaagatta sunniuteqarusullutalu siunnerfigigut anguniarlugit suleqataassaagut. Tamattami Qaasuitsup kommuniani innuttaasut pitsaanerusumik sullinneqalernissaat atugarissarnerulernissaallu siunertaralugu sulinissarput siunertarigipput qularutigingilluinnarpara, Ane Hansen oqarpoq.
Ane Hansenip suleqatigiilersut anguniagaat suleqatigiissutigisassaallu ujartorpai, ilaatigullu apeqquterpassuit makku akissuteqarfigeqqullugit:
- Qaasuitsup kommuniata avinneqarnissaanik qineqqusaaruteqartut suna siunnerfigaat qanorlu suleriaqqinniarpat? Meeqqat atuarfiata ajornartorsiuterpassui suut aqqutigalugit pitsangorsarniarneqarpat?
Inuussutissarsiornermi siuarsaanermi suut pilersinneqarnissaat siunertaappat? Utoqqaat innarluutillillu sullinneqarnerat sukkut pitsangorsarneqarniarpat? Meeqqat inuusuttullu peqqinnarnerusumik inuuneqalernissaanni suut aqqutiglugit anguniarneqarpa? Kommunit allaffii innuttaasunik pitsaasumik sullissisut qanoq pitsangorsaaffiginiarneqarpat? Namminersorlutik Oqartussaniit oqartussaaffiit tulliisut suut salliutinneqarpat?
- Apeqquterpassuit silaannarmi erfattut akissutissarsissallugit erininarsivoq, kommunit sinnerisa suleqatigiissutissatik siunniussallu pingarnerit saqqummiussorsimalererpaat. Naagukua Qaasuitsup kommuniani suleqatigiinniat suliniutiginiagaat. Qineqqusaarutit tungavigalugit sorliit piviusunngortinneqarniarpat imaluunnit oqaasiinnaasimanerpat? Soorlu kommunip avinneqarnissaanik nalorninaattumik qineqqusartut qineqqusarutaat eqqarsaatigalugit, Ane Hansen, Inuit Ataqatigiit sinnerlugit Qaasuitsup Kommuniani kommunalbestyrelsimut qinigaasoq naggasiivoq.