Ane Hansen: IWC-mi ilaasortaaneq isummersuutigineqassaaq
Nunatsinni arfattassat ukiumut katillugit maanna 211-usunit 221-nut amerlineqarnissaanik siunnersuut, Arfanniarneq pillugu atatsimiititaliarsuarmi itigartineqareersorlu Piniarnermut naalakkersuisoq, Ane Hansen, 2010-mi isummersuutigerikkani saqqummiuteqqippaa.
- Taamatut amerlanerussuteqartut IWC-imi nunat ilaasortaasut taasinerat ajuusaarnartorujussuuvoq aammalu nunat tamalaat akornanni isumaqatigiissutaasartuni, nunani taakkunanerpiaq isumaqatitaaffigineqartunut naapertuunnani. Soorlu qanittumi Rio-mi isumaqatigiissut, tamarmik akuerisimasaat, piujuaannartitsineq tunngavigalugu nammineq pisuussutinik nerisaqarnerulernissami siunertanut tunngatillugu - naapertuutinngilaq, Piniarnermut naalakkersuisoq Ane Hansen oqarpoq.
Taassuma atorfilittami ataatsimeersuaarnermi peqataasup Amalie Jessenip ippassaq oqaasii uteqqillugit, erseqqissarpaa IWC-miit malittarisassat tassanilu ilisimatuut komité-ata inassutai maleqqissaarlugit, Nunarput siunnersuusiorsimagaluartoq.
Naalakkersuisut siulittaasuat Kuupik Kleist 2010-mi ukiortaami oqalugiarnermini ilaatigut oqarpoq Arfanniarneq pillugu Ataatsimiititaliarsuarmi ilaasortaajunnaarnissaq naalakkersuisut 2010-mi isumaliutigisassaasa ilaanniittoq. Tamatumungalu atatillugu Ane Hansen januarimi 2010-mi ima oqarpoq:
- Uumasunik illersuiniaqatigiit sunniinerat pissaaneqarnerallu annertusiartuinnarsimavoq maannamut. Tamatuma kingunerisimavaa allaat ilisimatuussutsikkut ataatsimiisitaliap nungusaataanngitsumik piniarneqarsinnaasutut isigalugit innersuussutigisartagai malinneqartaratik, Ane Hansen januarimi 2010-mi ilaatigut oqarpoq. Eqqarsaatillu taamaattut allanngorsimannginnerarpai:
- Misissugassaqqinnera annikillinngilaq pissutsit taamatut ineriartornerat eqqarsaatigalugu, Ane Hansen oqarpoq.
NAMMCO tassaavoq miluumasut imarmiut pillugit nunat atlantikup avannaaniittut isumasioqatigiittarfiat, malinnaallutillu najuuttartut ilanngukkaanni tassaapput: Nunarput, Island, Norge ,Savalimmiut, Canada, Rusland aamma Japan IWC-miit anillutik nammineq oqaloqatigiittarfeqalernissaat, Ane Hansenip sulissutigaa.
- Septemberimi NAMMCO-p ataatsimiinnissaani NAMMCO-mi nunat ilaasortat aammalu alaatsinaattutut ilaasartut qaaqqunikuuakka. Taakku ministerit oqaloqatigiumallugit isumasiussallugillu aamma IWC-mi pissutsit taamatut ineriartornerat pillugu siunissami allaanerusumik suleqatigiittoqarsinnaaneranik oqaloqatigiittoqarnissaa siunnersuutiginikuuara, Ane Hansen oqarpoq.
IWC-mi ilaasortaaginnarnissaq aninissarluunniit pillugu inatsisartut isummernissamut periarfissaqassapput ukiaru ataatsimiinnissami Ane Hansen saqqummiussaqarpat.
- Angumerisinnaagutsigu ukiamut inatsisartut ataatsimiinnissaanut isumasiuinermik nassiussaqassuunga inatsisartunut ilaasortat isumasiorlugit IWC-mi siunissarput qanoq ittuusariaqarnersoq, Ane Hansen naggasiivoq.
