Andreas Uldum SIK-mit illuatungilerneqarpoq
Akileraartarnermi ilanngaatip sulisunut 2014-imi januaarip aallaqqaataaniit atuutilersussatut siunnersuutigineqarpoq, Demokraatit sinnerlugit inatsisartunut ilaasortaq Andreas Uldum siunnersuussiortuulluni.Sulinerup imminut akilersinnaanissaa matumani anguniarneqarpoq, amerlanerillu sulerusussuseqalernissaat neriuutaalluni.
Siunnersuulli SIK-mit illuatungilerneqarpoq.
- Sulinermi ilanngaat ima paasineqartussaavoq: Sulinissamut toqqammavissaq annertusarusukkakku, isertitat annertusinissaat, Demokraatit sinnerlugit inatsisartunut ilaasortaq Andreas Uldum taama oqarpoq, siunnersuusiornermullu siunertaq nassuiaateqarfigalugu:
- Sulinerup imminut akilernerulernissaa siunertarivara. Akileraartarnermut Atugarissaarnermullu Ataatsimiititaliarsuup nalunaarusiaanni eqqarsaatersuutigineqartut aallaavigalugit siunnersuusiorpunga, isummallu nunani allani atorneqarsimasut misissuataarsimallugit, Andreas Uldum oqarpoq.
Sulinerminnut atatillugu ilanngaatisiap annertussusilereerneqarnissaa Demokraatit orniginartinngilaat, akileraartarnerli pillugu Danmarkimi kingullermik isumaqatigiissusiortoqarmat sulinermut atatillugu ilanngaat qaffanneqarpoq, Danmarkimilu taamatut aaqqiisoqarnera isumassarsiorfigineqarsinnaanerarlugu.
Sulinermik Inuussutissarsiuteqartut Kattuffiata, SIK-p, siunnersuut illuatungilerpaa, Nunatsinni suliffissaaleqisut taama amerlatigisut sulinermut atatillugu ilanngaammik atuutilersitsineq suliffinnik pilersitsinavianngitsoq oqaatigalugu. SIK-p siulittaasua Jess G. Berthelsen:
- Sulinermut ilanngaatip atuutilersinneqassappat sulilersut amerlinerulernissaat kingunerinavianngilaa. Illoqarfinni arlalinni annertuumik suliffissaaleqisoqarpoq, taamaattumik kikkunnut tamanut iluaqutaanerussaaq akileraarut procentimik ataatsimik appartinneqarpat. Isuma taanna SIK-p imaaliallaannarlugu takujuminaatsikkaluarpaa, sulinermulli ilanngaammut sanilliullugu tamanna orniginartinneruarput, SIK-p siulittaasua Jess G. Berthelsen oqarpoq.
