Anaanap timaa kusanartoq
Pinissusermut anguniagassat inersimasunngornermi timillu allanngoriartornerani inunnut amerlanerpaanut angujuminaassinnaasut. Naartoreernermi timi allanngortarpoq isikkorisimasaanullu utertikkuminaattarluni.
Aamma atuaruk Nukappiaqqap kræftertup ilaqutaanut katersuniarneq iluatsilluartoq
Ilaatigut pissutsit tamakku eqqarsaatigalugit, anaananngoreernerup kingorna timi qanoq-ittunngortarnersoq Emilie Binzerip nittartakkamini Eskimo i stilleter- mik atilimmi assitigut takusassiaralugit ersersinniarsaraa.
- Isumaqarpunga asseqarpallaartoq takutitsisunik ullutsinni orsoqaqqusaangitsugut, ameq tasissimassanngitsoq, naatsumimmi oqaatigalugu timerput iluseqaqqusaanngitsoq. Anaananngoreernermalu kingorna timiga akueriuminaatsissimavara, naamma amia tasisimammat, nakkangalersimallunilu. Kisianni eqqarsarpunga sooq kangusussaanga, tassami meeqqamik ernisinnaaneq piginnaasani torraanerpaammat, Emilie Binzer taama oqarpoq.
Pilatsinnissamut eqqarsaateqarneq
Timini akueriuminaatsillugu pilatsinnissani eqqarsaatigisarsimavaa, nittartakkaminilu allaaserisimallugu.
- Ukioq ataaseq qaangiummat pilatsinnissara eqqarsaatigisarlugu allaaserivara, inuppassuillu qisuariarfigivaat, ilai taamaalioqqusinngitsut ilaalu killormut. Taamaallungalu arnap USA-meersup timini facebookikkut takutikkaa naammaattoorpara, Emilie Binzerip arnaq takugamiuk isumassarsivoq meerartaarsimasut timaannik nammineq takutitserusulluni.
Malugisimavaa amerlasuut timiminnik takutitsinissartik killissamik qaangiinertut isigisaraat, meerartaarsimalluni timip allanngorsimasup takutinnissaa sapernartarmat. Taamaammat Emilie anaanatut timini siulliulluni takutippaa, nalunnginnamiuk siulliunngikkuni suliani iluatsinnaviarnagu.
Taamaalioreerneratalu kingorna qisuariartorpassuaqarpoq, ullumikkullu inuit 10.000-it facebookkimi quppernera 'Moderkroppen' takusimavaat. Oqaaseqaateqartut ilaat ima allappoq
Suliaq torrak, sunaaffa kisima taama timeqanngilanga
Suliniutimilu ilassilluarneqarnera nuannaarutigaa.
- Inuit ilassilluaqaat, siulliullunga assinnik ikkusinngikkuma, allat peqataarusussanngitsut aallaqqaataaniilli nalunngilara. Isumaqaraluarpungalu ukioq naallugu peqataasussanik ujarlissallunga, ullualuilli qaangiummata peqataajumasut 30-it angoriikatappaat, Emilie Binzer taama oqarpoq.
Anaanat sapiitsut assingi takorusukkukkit Facebookikkut quppernermi 'Moderkroppen'-imi takusinnaavatit.
