Nukappiaqqap kræftertup ilaqutaanut katersuniarneq iluatsilluartoq
![](/sites/default/files/styles/image_934x467/public/article_images/rigshospitalet630_1.jpg?itok=pLijocVi)
Nukappiaqqap angajoqqavi taassumalu qatanngutai marluk Danmarkimiipput, nukappiaqqap katsorsarneqarnerani najorusukkamikku.
Ilaqutariit Kûitsi Jakobsenikkut pisortanit ikiorneqarsinnaanngillat, tamatumunnga inatsisit kommunimit pisinnaatitsinngimmata.
Taamaattumik Tasiilami innuttaasut namminneq piumassutsiminnik suliniuteqartut Tasiilami katersortarfimmi sapaammi septembarip ulluisa 13-ianni katersuiniarput, kaffimik kaaginillu tunininiaallutik.
- Qujanaqaaq taama tapersersuisinnaammata, qujanaqaaq tupallernaqaaq. Ilaqutariiulluta misigisimavugut annertoorujussuarmik tapersorneqarluta, nukiaqqap kræftimik nappaateqartup anaanaa, Gunda Kûitsi Jakobsen, taama oqarpoq.
Katersuiniartoqarnerani tapersersuit amerlapput, katersuiniarnermut suliniuteqartut ilaat Aviaaja Ikila Abelsen oqarpoq.
- Katersuiniarnitsinni katersortarfimmi inuit nuannaarlutik isertarput, taakkua nersualaarinnipput namminneq piumassutsimik katersuniarnerput pillugu.
Annaasaqareersimasut
Aviaajap ilaqutariit Kûitsi Jakobsenikkut tapersersorusussimavai, alianartumik allamik nalaataqareernikuummata, tassalu ernerat angajulleq 16-nik ukiulik qarasatsamigut aannaartoornermi kingorna marsip qaammataani toqukkut qimagummat.
Aningaasat Tasiilami katersorneqartut ilaqutariit atorfissaqartikkaat anaanaasoq oqaluttuarpoq.
- Ernumanarpoq uagutsinnut isertitaqanngitsugut tamassuma qitornatsinnut kinguneqarnissaa ernumanarmat, taakkua kaannissaat kissaatiginanngimmat, Gunda Kûitsi Jakobsen taama oqarpoq.
Nukappiaraq katsorsartinnermi kingorna siumut aallarsimavoq.
- Siumut aallarnikuuvoq, issiasalernikuuvoq tigumiagaqarlunilu nikorfasinnaalernikuuvoq, kisianni suli pisussinnaanngilaq aamma suli nukittorsaqqinnikuunngilaq, Gunda Kûitsi Jakobsen oqarpoq.
Aningaasat katersorneqartut atisanut atorneqassapput, ilaqutariillu Kûitsi Jakobsen suli Danmarkimiikkallassapput.
Ilaqutariit Kûitsi Jakobsen qarasaasiakkut nittartakkami Facebookimi nittartagaqarput: Ilaqutariit Kuitse Jakobsenikkut tapersersortigit.