Ammerivik Great Greenlandimit piseqqikkumajunnaarpoq

Nunatta ammeriviata ammit suliareriikkat akii 130 koruuninik qaffammagilli puisit amiinik mersortarfik, Inuit Pels Maniitsumiittoq suli piseqqissimanngilaq, suliffeqarfitsik aningaasatigut ingerlalluartorujussuunngimmat akikinnerusullu ujartortariaqaramikkit, taama oqarpoq piginneqataasoq ilisserusiortartorlu Jens Jerimiassen.

-Ingerlatiinnassagutsigu soorunami aningaasaqarnikkut malugisorujussuussavarput. Suliffeqarfipput aningaasaqarnikkut qummuinnaq ingerlasimasuuppat immaqa ajornavianngikkaluarpoq, taamaattoqanngippalli suliffeqarfiup soorunalimi amernik akikinnerusunik piniarnissaq kisiat eqqarsaatigissavaa, Jens Jerimiassen erseqqissaavoq.

Jens Jerimiassenip taamaalilluni uppernarsarnerarpaa Great Greenlandimut pisiniarnatik avataanit amernik pisiniarnissartik eqqarsaatersuutigigitsik. Ameerniarfiit allat Danmarkimi Norgemiittullu qiviallattaalersimagitsik oqarpoq.

Danmarkimi Norgemiluunniit amersiniartalersinnaanertik eqqarsaatersuutigalugu, Jens Jerimiassen oqarpoq.

Michael Nielsen Nunatta Ammeriviata, Great Greenlandip pisortaanera nassuiaavoq, nunanut allanut tuniniartakkaminnut sanilliullugit nunatsinni tunisartakkatik 30 procentimik akikinnerusut.

-Inuit Pelsermiut allani taama akikitsisigisunik pisisinnaanngillat. Aap, immaqa ammit pitsaanerunngitsut B-miittut uagut amiitigut A-jupput. Taamaattumik Inuit Pels allani amernik pisiniarniaruni taamaalioriannguarli, Michael Nielsen oqarpoq.

Puisit amiisa akii 622 koruuniniit 752 koruuninut qaffatsinneqarput.