Amigartoorutit naammagisimaarnartut
Kommuune 1,2 milliarder koruuninik isertitaqarpoq aningasartuutit 100 millioner koruuninik ikinnerullutik.
Sanaartornernut aningaasartuutit aningaasaliissutigineqarsimasullu katillutik 178,0 millioner koruuniusut, Kommuneqarfik Sermersooq taamatut nalunaaruteqarpoq.
2010-mut naatsorsuutini angusat aningaasaliissutini 110 mio. koruuninik amigartooruteqartussatut naatsorsuutigineqartunut sanilliunneqassasut Kommuneqarfik Sermersuumit nalunaarutigineqarpoq. Taamaattumik 2010-mut naatsorsuutit naatorsuutigineqartumit 24 mio. koruuninik pitsaanerullutik.
Kommuunip nalunaaruteqarnera malillugu sanaartornissamut atugassanik sipaaruteqartoqarsimavoq. Kommuunip siorna taarsigassarsisinnaatitaanini suli atorluarsimanngilaa, imaassinnaasorli 2011-mi imaluunniit 2012-imi taarsigassarsisinnaasoq, kommune nalunaarpoq.
Kukkunersiuisut oqaaseqaataanni allaffissornermi nakkutilliinerit, ingerlatsinerit, oqimaaqatigiissitsinerit ilaalu ilanngullugit suli annertuumik ajornartorsiutaasut kommuunimit erseqqissaatigineqarpoq.
Allaffissornermi nalinginnaasumik ilorraap tungaanut ineriartortoqartoq kommuunimit qulakkeerlugu oqaatigineqarpoq, aamma 2011-mut naatsorsuutini suliniuteqarnerujussuit allaffissornermi ileqquliussanik pilersitsiniarluni aallartinneqarsimasut kingunerisa takunissaat naatsorsuutigineqartoq kommuunimit oqaatigineqarpoq, tamakkualu kommunip kukkunersiuisuisa Deloitte-kkut aallarteqqusimagaat nalunaarutigineqarluni.