ISUMASIUINEQ Amerlanerussuteqartut namminiilivinnissamut angertut
Inunnik isumasiuisartut HS Analysemeersut aviisi Sermitsiaq sinnerlugu isumasiuisimanerisa tamanna takutippaa.
Kalaallit Nunaata namminiilivinnissaanut tapersersuisut 64 procentiusut kisitsisit takutippaat, inuimmi isumasiuinermi aperineqartut 64 procentiisa nunatta namminiilivinnissaa "Pingaaruteqartorujussuusoq" imaluunniit "Pingaaruteqakannersoq" oqaatigaat.
Apersorneqartut 24 procentii isumaqarput nunatta namminiilivinnissaa "Pingaaruteqarpallaanngitsoq" imaluunniit "Pingaaruteqanngilluinnartoq". 12 procentii qanoq isummissanerlutik nalunerarpaat.
Aamma atuaruk Suka K. Frederiksenip Savalimmiut isumassarsiorfigigai
Inuusuttut akornanni tapersersuisut ikinnerulaarput, nunatta namminiilivinnissaanut tapersersuisut katillutik 56 procentiugamik.
Partiit akornanni isumasiuinerit takutippaat tassani aamma assigiinngisitaartut, Atassummik qinersisartut nunatta namminiilivinnissaanik tapersersuisut ikinnerussuteqarput, apersorneqartut 46 procentiit isumaqataagamik.
Siumumik, Inuit Ataqatigiinnik Partii Naleqqamillu qinersisartut akornanni amerlanerussuteqartut nunatta namminiilivinnnissaa tapersersorpaat, ataatsimummi isigalugu 70 procentit isumaqataammata.
Aamma atuaruk Tunngaviusumik inatsit Danmarkip tunngaviusumik inatsisaata ataaniissaanngilaq
Kalaallit Nunaanni innuttaasut katitigaaneranik naapertuuttumik sinniisuusut 708-t, HS Analysep Sermitsiaq sinnerlugu apersorsimavai.
Kisitsisit HS Analysep inunnik isumasiuisimaneranut tunngasut Sermitsiami ullumi tallimanngornermi saqqummersumi atuarneqarsinnaapput.))
Aamma atuaruk Kalaallit Nunaanni inatsisinut tunngaviusussanut isumalioqatigiissitaq 2017-imi pilersinneqarniartoq
