Kalaallit Nunaanni inatsisinut tunngaviusussanut isumalioqatigiissitaq 2017-imi pilersinneqarniartoq
Isumalioqatigiissitamik Nunatsinni tunngaviusumik inatsiseqalernissamut siunnersuusiortussamik 2017-imi pilersitsinissamut Naalakkersuisut piginnaatitaaffeqalernissaannut siunnersuut Inatsisartut immikkut ittumik ullumi ataatsimiinneranni oqaluuserissavaat.
Namminersornermut, pinngortitamut, avatangiisinut nunaateqarnermullu naalakkersuisortaap, Siumumeersup Suka K. Frederiksenip aalajangiiffigisassatut siunnersuutaa Inatsisartut isummerfigissavaat.
Aamma atuaruk Naalakkersuisut ivertinneqartut qulissaat
Siunnersuut akuerineqassappat Naalakkersuisut Nunatsinni inatsisinut tunngaviusussanut isumalioqatigiissitaliornissamut piginnaatitaaffeqalissapput.
Isumaliioqatigiissitap suliarisassaata allattorsimaffiata inaarutaasup iluarsinissaa, akuersissuteqarfiginissaa aalajangersarnissaalu Inatsisartut namminneerlutik aalajangiiffigisussaagaat, Suka K. Frederiksen siunnersuutip tunngavilersuutaani allappoq.
Isumalioqatigiissitaq Nunarput namminersulereerpat aatsaat tunngaviusunik inatsisiliussanersoq, imaluunniit siullermik danskit tunngaviusumik inatsisaata sinaakkutaata iluani Namminersorlutik Oqartussat ataanni atuuttussamik, kingornalu Nunatta namminersulernerani atuuttussamik tunngaviusumik inatsisiliussanersoq, Inatsisartut isummerfigissavaat.
Siunnersuut isumalioqatigiissitap qanoq sulisinnaanersoq pillugu nassuiaammit Naalakkersuisut siulittaasuata naalakkersuisoqarfianit suliarineqartumit aallaaveqarpoq.
Aamma atuaruk Kalaallit Nunaanni inatsisinut tunngaviusussanut isumalioqatigiissitamik pilersitsinissamut nalunaarusiaq
Isumalioqatigiissitamut suliap ukiut pingasut ingerlarnerini naammassineqarnissaa nassuiaammi siunnerfigineqarpoq. Inatsisartut ataatsimiititaliaagallartumik partiinit tamanit ilaasortaaffigineqartumik isumalioqatigiissitallu suliaanut malinnaasussamik pilersitsinissaat nassuiaammi aamma kajumissaarutigineqarpoq.
Allattoqarfimmik pilersitsinissaq kikkullu isumalioqatigiissitamiissanersut pillugu aalajangerneq ukiumi siullermi suliarineqassasut, nassuiaammi innersuussutigineqarpoq.
Sulialli sukkanerpaamik aallartinnissaa Naalakkersuisut kissaatigaat, Nunattalu tunngaviusumik inatsiseqalernissaanut isumalioqatigiissitap ingerlatassaanut allattoqarfeqarnissaanullu 2017-imut 2018-imullu aningaasanut inatsisini immikkoortitsisoqassasoq, Suka K. Frederiksen allappoq.
Siunnersuut Inatsisartunit arfininngornermi siullermeerneqassaaq ataasinngornermilu aappassaaneerneqassalluni.
