Naalakkersuisut ivertinneqartut qulissaat
- Suliassat amerlaqaat. Namminersulivikkusunneq anguniarnikuuvarput ukiorpassuarni. Oqallsiginikuuvarput annertoorujusuarmik, kisianni annerusumik alloriarfigineq ajorlugu. Taamaattumik suliassaq imaannaanngitsut amerlasuut naatsorsuutigaara suleqataaffigilertussaassallugit, Namminersornermut, Pinngortitamut Avatangiisinullu kiisalu Nunaateqarnermut naalakkersuisortaaq, Siumumeersoq 51-inik ukiulik, Suka K. Frederiksen KNR-imut oqarpoq.
Naalakkersuisunngorlaap suliassai suli tigussaarpianngillat. Piffissalli aggersup ulapiffiusussaasorujussuunera Frederiksenip nalunngilaa.
- Oqartussaaffiit amerlasoorujussuit maannakkut suli Danmarkimi inissisimapput, saniatigullu uagut nammineq tunngaviusumik inatsiseqanngilagut, taamaattumik suleqatigiisitat aqqutigalugit suliniutissallu immikkut suliassat annertuumik suliassaqarfigisussaavagut. Tulleriiaarinissaq pingaaruteqartussaavoq, oqartussaaffik angisuujugami, kisianni isumalluarfigivarput, Suka K. Frederiksen oqarpoq.
