Suka K. Frederiksenip Savalimmiut isumassarsiorfigigai
![](/sites/default/files/styles/image_934x467/public/article_images/suka.jpg?itok=_p-2QZxa)
Angalanerup siunertaasa ilagivaat namminiilivinnissamut ingerlaarnermi, pingaartumik Savalimmiunut inatsisinut tunngaviusussanik suliaqarnermi, Savalimmiut misilittagaasa tusagaqarfiginissaat.
Naalakkersuisup Savalimmiuni lagmand Aksel V. Johannesen marlunngornermi ataatsimeeqatigaa, lagmandilu Savalimmiunut inatsisinut tunngaviusussat nutaat suliarineqarnerisa killiffiat pillugu ilisimatitsilluni.
Naatsorsuutigineqarpoq savalimmiormiut 2017-imi inatsisinut tunngaviusussat nutaat pillugit innuttaasunik taasititsissasut.
- Aalajangersimalluinnartumik Kalaallit Nunaanni inatsisinut tunngaviusussanut isumalioqatigiissitamik maannakkut pilersitsinitsinni, Savalimmiut inatsisinut tunngaviusussanut missingiummik allannerminni misilittagaat annertoorujussuarmik iluaqutigisinnaavagut. Savalimmiut lagmand-ianik ataatsimeeqateqarneq annertuumik pissarsiviuvoq, aammalu suliassaqarfimmi tassani qanimut suleqatigiinnerup ingerlaannarnissaa qilanaaraara, Suka K. Frederiksen oqarpoq.
AAMMA ATUARUK Suka: Naalagaaffiup akisussaaffini tigusariaqarpaa
Namminiilivinneq aamma imminut pilersornermut tunngassuteqarpoq, taamaattumik Naalakkersuisup Savalimmiuni immuliorfik MBM pulaarpaa.
Savalimmiormiut immuliorfimmi nammineq tunisassiornermik misilittagaqarluarput, tamannalu Naalakkersuisunut, Kalaallit Nunaata nunaateqarnermi tunisassianik imminut pilersorneranik siuarsaanissamik sulissutiginnittunut soqutiginaateqarpoq.
Piffissaq iluatsillugu Savalimmiut aamma Kalaallit Nunaata avatangiisinut aamma silap pissusaanut suliassaqarfimmi suleqatigiinnerat oqallisigineqarpoq. Taamaalilluni Naalakkersuisup Savalimmiuni nunamut namminermut peqqissutsimullu ministeri Sirið Stenberg sisamanngorpat ataatsimeeqatigissavaa.