CAMP CENTURY Suka: Naalagaaffiup akisussaaffini tigusariaqarpaa
![Suka K. Frederiksen](/sites/default/files/styles/image_934x467/public/suka_k._frederiksen.jpg?itok=sTlkKFSI)
Nunarput USA-miut sakkutooqarfigisimasaata salinneqarnissaannut akisussaaqataasinnaasoq danskit avatangiisunut ministeriata, Esben Lunde Larsenip, sapaatit akunnerata siuliani isumasioqatigiinnermi oqaatigaa.
Tamanna avatangiisinut naalakkersuisuisup, Siumumeersup Suka K. Frederiksenip, isumaqatiginngilluinnarpaa, naalakkersuisorlu isumaqarpoq danskit akisussaassuseqarnertik ersersittariaqaraat.
Avatangiisinut akisussaaffik Nunatta 1989-imi tiguaa.
USA-miut sakkutooqarfigisimasaat Camp Century pillugu pingasunngormat isumasioqatigiittoqarmat, Esben Lunde Larsenip tamanna innersuussutigaa.
- Kalaallit Nunaata avatangiisit pillugit akisussaaffik tigoreeraa innersuussutigissallugu akuersaarneqarsinnaasoq isumaqarpunga, avatangiisinut ministeri, Esben Lunde Larsen siornatigut taama oqarpoq.
Taamaattumik tamarmik taakku isigalugit erseqqissumik oqaatigiinnarsinnaavarput Kalaallit Nunaannit piumasarivarput danskit naalagaaffiat akisussaaffimminnik tigusissasoq
- Suka K. Frederiksen, Siumut
Avatangiisinulli naalakkersuisoq, Suka K. Frederiksen ministerimut isumaqataanngilaq.
- Mingutsitsisoq aammalu akuersisoq, taannaavoq akisussaasuusoq suliamik ingerlatitseqqiinissamut, taamaattumik allanngunngillat tassuuna isummagut. Naalakkersuinikkut suliaqarnikkut sutigut tamatigut oqariartuutigivarput, sapinngisamik piaartumik iliuusissamik pilersaarummik saqqummiussisoqartariaqarpoq, timitaliisoqartariaqarpoq saliinissaq eqqarsaatigalugu, Suka K. Frederiksen KNR-imut taama oqarpoq, nangillunilu:
- Taamaattumik tamarmik taakku isigalugit erseqqissumik oqaatigiinnarsinnaavarput Kalaallit Nunaannit piumasarivarput danskit naalagaaffiat akisussaaffimminnik tigusissasoq, Suka K. Frederiksen taama oqarpoq, suleqatigiittoqarsinnaasorli oqaatigalugu.
- Suleqatigiiffissaqarsinnaavugut ugguuna eqqarsaatigalugu kingusinnerusukkut silaannaap allanngoriartorneranut ilisimatusarnikkut misissuinerit assigiinngitsorpassuasiik ingerlaqatigiiffigalugit. Taamaattorli ukua nunamut atuinerit qimaannakkallu kialluunniit taakkua qularutigisussaanngilaat, soorunami saliisoqartariaqarpoq sumiiffimmi aamma inoqarmat, avatangiisinut naalakkersuisoq, Suka K. Frederiksen taama oqarpoq.