Amerikamiut uuliasiortut pisortaata oqaluttuani allanngorteqqikkaa - tamatumuuna Dr. Phil-imut

Amerikamiut uuliasiortut pisortaannik Dr.Phil-imillu Jameson Land Basin pillugu apersuineq nutaaq maanna uissuummissutaavoq. KNR-ip piviusut paasiniarpai.

Allattoq Markus Valentin

juunip 26-at 2026 08:16

Nutserisoq Medea Olsen, Ivalu Thorleifsen, Connie Fontain

- Jameson Land Basin tamaat maanna pigaarput. Hektarit millionit marluk tamaasa.

Amerikamiu uuliasioqatigiiffimmik Greenland Energy Companymik piginnittoq, tv-kkut ilisimaneqartumit Dr. Phil-imit videopodcastikkut sapaatip akunnerata aallartinnerani apersorneqarami oqarpoq.

Angut tassaavoq Robert Price. Taanna nammineq ingerlatseqatigiiffiutimilu uuliasiornerup tungaatigut anguniagaat pillugit saqqummiiniarluni, Ittoqqortoormiini innuttaasunut juunip qulinganni ataatsimiititsivoq.

Taanna tusagassiortut ataatsimiinnerup kingorna apersuilermata qimaavoq.

Múte B. Egedep (IA), Nunanut allanut, Inuussutissarsiornermut Aatsitassanullu Naalakkersuisup, ingerlatseqatigiiffiup avammut paasissutissiisarnera pissutsinik piviusunik tunngaveqartarnissaa naalakkersuisoqarfimmit erseqqissarneqarsimasoq, KNR-imut siornatigut oqaatigaa.

Robert Pricep Ittoqqortoormiini innuttaasunut paasissutissiissutigisai Namminersorlutik Oqartussat paasissutissiissutigisaasa assigai.

Amerikamiulli tusagassiorfiinut piviusoq tamatigut oqaatigineq ajorpaa. Tamannalu tunngavigalugu ingerlatseqatigiiffiup tusagassiuutitigut avammut oqariartuutai piviusunut tamatigut naapertuunneq ajortut, naalakkersuisup oqaatigaa.

- Naalakkersuisut piumasaqaat tamanna attappaat. Nunatsinni suliaqarniaraanni nunap inatsisai innuttaasuilu ataqqineqassapput. Nunani suliaqarfiginiakkami inatsisit innuttaasullu ataqqineqassapput, Múte B. Egede oqarpoq.

- Aningaasarpassuarnik isertitaqarnissamik oqariartuuteqarneq qitiutinneqassanngilaq.

Puilasuliat 3,5 kilometerinik itissusillit marluk

Amerikamiut uuliasiortut pisortaata ingerlatseqatigiiffik puilasuliani marlunni oktobarip aallartinnerani qilleriumaartoq, podcastimi aamma oqaluttuaraa.

Robert Pricep nunap ataani qaleriiaat tallimat uuliasiornerminni akimorlugit qillissagaat tassani oqaluttuaraa. Qaleriiaat itinersaat nunami 11.500 fodinik ititigisumiippoq. Tamanna 3,5 kilometeriuvoq.

Greenland Energy Companyp Inuussutissarsiornermut Aatsitassanullu naalakkersuisoqarfimmut sumiiffiup tamatuma nunataanik misissuinissamut akuersissummik qinnuteqarsimanerat, KNR-ip juunip aallartinnerani nutaarsiassiissutigaa.

Taamaattumik uuliasiornissamut akuersissuteqanngillat.

Nunap sananeqaataa pillugu aallarniummik misissuineq, misissueqqissaarnissamut akuersissummi, tamanna 2025-mi tunniunneqartumi, immikkoortup aappaattut inissisimavoq.

Misissueqqissaarnissamut akuersissutip immikkoortuisa pingajuanni kingullermilu aatsaat sumiiffimmi uuliaqarneranik misissuisoqassaaq.

Aamma atuaruk Naalakkersuisoqarfiup pisortaa eqqissisaasoq: Amerikamiut uuliasiorfiat Jameson Landimi uuliasiornissamik qinnuteqaateqartoq

Naalakkersuisoqarfimmi pisortaq Jørgen Hammeken-Holm tusagassiuutitigut nalunaarutit uissuumminartut pissutigalugit KNR-imut taamanikkut ima oqaaseqarpoq:

- Nunatsinnut nunanullu allanut nappartanik uuliamik imalinnik milliardilikkaanik nassaangajalernerarlutik tusagassiuutitigut siullermik nalunaarutigineqartut assut eqqarsaatiginikuuakka, Jørgen Hammeken-Holm oqarpoq nangillunilu:

- Taama amerlatigisunik aningaasaliinissaminnut akissaqanngikkallarput akissaqaraluarunilluunniimmi aamma uuliamik nassaartoqaraluarpat ukiut qulit aatsaat qaangiuppata iluanaarutaasinnaalissapput.

Namminneq imminnut tatigisut

Robert Pricep Jameson Land Basinimi nappartanik uuliamik imalinnik 13 milliardinik peqarnera ingeniørinilu upperigitsik siornatigut oqaatigaa.

Geusip, Nunaoilip naalakkersuisullu 2022-mi nalunaarutaanni allaqqasoq naapertorlugu nappartanik uuliamik imalinnik 350 millioninik peqarnera taamaallaat 90 procentit missaannik qularnaassuseqarnera nalilerneqarpoq.

Aamma atuarukNaalakkersuisup Ittoqqortoormiini innuuttaasunut uulia pillugu ataatsimiititsineq oqaaseqarfigigaa

Robert Pricelli tamanna naliliineq upperivallaanngilaa. Namminerli ingeniørini upperinerullugit.

- Ingeniøritta tamarmik upperaat. Oqarneq ajorput ‘uuliamik nassaassagutta’ oqartarlutilli ‘uuliamik nassaarutta’ aamma qanoq atsigisumik nassaassanerluta oqaatigisarpaat, Robert Price podcastimi oqarpoq.

Jameson Land Basinimi nuna, sila pissutsillu suliffigiuminaakkaluartut piviusunngortissinnaanera Robert Pricep qularutiginngilaa.

- Amerikamiut uuliamik gassimillu nassaassarsiullaqqinnerat suunngitsuaqqatut isigineqanngisaannassaaq.

Robert Pricep oqaasii pillugit paasissutissanik misissuineq

Robert Pricep podcastimi uissuummissutigineqartunik arlalinnik saqqummiussaqarpoq. Oqaaserisaasa ilaat taakkulu pillugit ilisimaleriikkagut aaku:

1. - Jameson Land Basinimi hektarit millionit marluk pigaagut.

Greenland Energy Company suleqatigisaalu sumiiffimmi misissueqqissaarnissamut piiaanissamullu akuersissuteqarfigineqarput. Nunatsinni inatsisit naapertorlugit nunamik nammineerluni piginnittoqarsinnaanngilaq.

2. - Puilasuliat siulliit marluk ukioq manna qilleriffigissavagut. Oktobarimi sapaatip akunnerata aappaani qillerilissaagut.

Inuussutissarsiornermut Aatsitassanullu Naalakkersuisoqarfiup qinnuteqaat maajimi tigusimagaa, KNR-ip juunip aallartinnerani allaaseraa. Uanilu nunap qanoq innera misissorniarneqarpoq, uuliamillu qillerisoqassanani.
Nunap qanoq inneranik misissueqqaarneq misissuinissamut akuersissuteqarfigineqarnermi immikkoortup aappaa 2025-mi tunniunneqarpoq. Sumiiffimmi uuliaqarnersoq misissuinissamut akuersissutip immikkoortuata pingajuani sisamaanilu aatsaat qillerisoqalertarpoq.
Taamaammat qinnuteqaateqartoqarnera Namminersorlutik Oqartussanut eqqissisaataasoq, Naalakkersuisoqarfiup pisortaata Jørgen Hammeken-Holmip oqaatigaa.

3. - Pinngortitap ilusaani assigiinngitsut tallimat (qillerinermi aaqq.) tikissavagut. 11.500 fodimik (3,5 kilometerimik aaqq.) itissuseqartoq. Puilasuliap siulliup, nunap qaleriissaarneranik tallimanik ilaqartup nalilersornera ullunik 30-nik sivisussuseqassaaq.

Inuussutissarsiornermut Aatsitassanullu Naalakkersuisoqarfiup naalakkersuisoqarfimmi pisortap oqaaserisimasaa aallaavigalugu uuliamik puilasuliamik 3,5 kilometerinik itissuseqartumik pilersitsinissamut akuersissuteqartoqarsimanngitsoq oqaatiginikuuaa.

4. - Ingeniørigut tamarmik qularutiginninngilluinnarput. Taakku 'nassaassaguttamik' oqanngillat, kisianni uulia nassaarigutsigu aamma qanoq atsigisoq nassaarissaneripput oqaatigaat.

Geus-imit, Nunaoilimit naalakkersuisuniillu 2022-mi nalunaarusiaq naapertorlugu uuliat nappartat 350 millioniinnaassasut nalilerneqarpoq.
Naalli nalunaarusiami qulartoqangaatsiaraluartoq nappartanik 350 millioninik uuliaqarnissaanut 90 procentimik periarfissaqartoq aamma nappartanik 13 milliardinik uuliaqarnissaanut 10 procentimik periarfissaqartoq nalilerneqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.