Amerikamiut timmisartuata malersuutip tammaaneqartup aseqqukui nassaarineqartut
Sapaatiummat timmisartoq tammaaneqalersimasoq, malersuut F-35-mik taaneqartartoq ajutoornermik taaneqartumi, aseqqukui nassaarineqarsimapput.
Timmisartup aquttua ajoqusersimanngilaq, timmisartoq nakkalersillugu issivia igeriuttagaq atorlugu annassinnaasimavoq.
Timmisartup nakkarsimasup aseqqukui, nunaannarmi USA-p illoqarfeeraasa ilaata eqqaani, Williamsburgimi 15.425-nik innuttaqartumi , oqartussanit nassaarineqarsimapput, USA-mi sakkutuut taama nalunaaruteqarput.
Nunaminertaq timmisartup nakkarfigisimasaa sakkutooqarfimiit, akunnerit marluk misaannik ungasissuseqarpoq.
F-35-t amerikkamiut timmisartuliaat, radarikkut takuneqarsinnaajunnaarlugit suliaapput, tassa akeqqaniit takuneqarsinnaajunnaarsagaallutik.
Suliarineqarsimaneralli pitsaavallaartoq oqaatigineqarsinnaavoq, timmisartummi nakkanerani periarfeerutiivinneqarsimammat.
Oqartussat USA-mi innuttaasunut ikioqqullutik avammut nalunaaruteqareersimapput, nittartakkatigut inuit naapittarfianni, twitteriusimasumi, massakkut social medie X-itut nalunnginneqartoq, timmisartup aseqqukuisa sinnerisa sumiissusersinissaat oqartussaniit ajornakusoortinneqarmat.
Timmisartup nakkarnera sumik peqquteqavinnersoq nalunaarutigineqanngilaq, ajutuuinnarsimanertulli nalunaarutigineqarpoq.
Pisoq sapaaatit akunnerisa arfinillit ingerlaneranni, assigusumik, tassa akisuumik ajutoortoaqarneranik pisuuvoq. Class-A mishap-imik taaneqarpoq, aningaasanillu 2.5 million dollarsinik naleqarpoq, tassa koruuninngorlugit 17.5 million koruuninik naleqarpoq.
Nalunaarutigineqartuni ajutoornernik taaneqartuni siullerni marlunni, annertunerusumik allanik paasissutissiisoqanngilaq, kisiannili aggustimi amerikkamiut sakkutuui pingasut, Australiami timmisartup nakkarnerani ajunaarput, timmisartortartorlu alla USAmi San diegop eqqaani, timmisartup nakkarnerani ajunaarpoq.
