Amerikamiut millionilikkaat angerlarsimaffimminnit anisitaarataannaasut

Amerikamiut 40 millionit qaammatini aggersuni angerlarsimaffimminnit anisitaasinnaasut, insititutip nalilerpaa.
Inigisamik attartortut 30 procentii sinnerlugit inigisamut qaammatip tulliani akiliisinnaassannginnertik ernummatigigaat kisitsisit pisortatigoortut takutippaat. Assi © : Scanpix
Allattoq Ritzau
aggustip 13-at 2020 09:51

Coronavirusip USA-mi tuniluutilertornera pissutaalluni inuppassuit suliffeeruteqqapput, najukkaminniillu anisitaasinnaaratarsinnaallutik. Suliniaqatigiiffiit ikiuiniaqatigiiffiillu tamanna piareersarfigileruttorpaat.

Coronap nunat akornanni aningaasarsiorfiunerpaani ajornartoortitsinera pissutaalluni amerikamiut amerlasuut suliffeeruteqqapput, inigisamullu akiliinissamut ajornakusoortitsillutik.

AAMMA ATUARUK USA-mi meeqqat 97.000-it coronamik sapaatit akunneri marluk ingerlaneranni tunillatsittut

Ikiorsiissutissat nutaat Washington DC-mi isumaqatiginninniutigineqarnerat ajornakusoortorujussuupput, inuillu 40 millionit angullugit najukkaminnit qaammatini tulliuttuni anisitaaratarsinnaasut, suliniaqatigiiffiup The Aspen Institutep ernummatigaa. USA tamanna pillugu qajannarsisinnaasoq, The Aspen Institutep aarleqqutigaa.

Inigisamik attartortut 30 procentii sinnerlugit inigisamut qaammatip tulliani akiliisinnaassannginnertik ernummatigigaat kisitsisit pisortatigoortut takutippaat.

Maritou Diallo New Yorkimi najugaqarpoq, taanna suliffeqarunnaaramili angerlarsimaffimminnut martsimili akiliisimanngilaq. Siunissarlu ernumanartippaa.

- Massakkoqqissaaq ernumalluinnarpunga. Arfineq-pingasunik ukiulimmik meeraqarpunga, anisitaassagumalu qanoq iliornissara naluara, Maritou Diallo New Yorkip ilaani Bronximi inissiat akiisa appartinneqarnissaat pillugu akerliussutsimik takutitsinermi oqarpoq.