Amerikamiut aningaasaateqarfiat MIO pillugu atuakkamut aningaasaliisoq
Amerikamiut aningaasaateqarfianit 126.000 koruunit MIO-p suliaqarnera pillugu atuakkamut atorneqassappit. Meeqqammi pisinnaatitaaffiinut sullissiviup suliaqarnera pillugu atuakkiaq USA-mi aningaasaateqarfiup Triving Womenip aningaasaliineratigut saqqummersinneqassaaq.
- Meeqqat, inuusuttut ilaqutariillu atugarisaat paquminartutut isigineqaraluartut MIO-mit qaqilerneqarsinnaasarmata nunanit tamalaanit maluginiarneqarsimavoq, amerikamiut aningaasaateqarfianni pisortaaneq, Tia Oros Peters oqarpoq.
- Aviâja Egede Lyngep suleriaasianut isumassarsinartumut sulisuisalu sulilluarnerannut tapersersuisinnaagatta tulluusimaarutigaarput, tassami MIO-p suleriaatsit sumiiffinnut assigiinngitsunut tulluarsarneqarsimasut atorlugit suleriaaseqarmat.
Thriving Women nunap inoqqaavinik tapersersuisuuvoq.
Nunarput isumaqatigiissutinik eqquutsitsinngitsoq
MIO 2012-imi upernaakkut pilersinneqarpoq.
Sullissivik Naalagaaffiit Peqatigiit nunatsinni meeqqat pillugit isumaqatigiissutaat pillugu siammarterisussaavoq.
Suliassaqarluarporlu. Naalagaaffiit Peqatigiit Meeqqat pillugit isumaqatigiissutaanit 54-init 19-it nunatsinni malinneqanngitsoq MIO-p nammineq oqaatigaa.
AAMMA ATUARUK MIO innersuussutit pillugit: Alloriarnertut siullertut isigaarput
Taakku meeqqat timikkut tarnikkullu nakuusertoqarneranut aamma atornerlunermut illersorneqarnissaannut, angajoqqaaqanngitsut ikiorneqarnissamik pisinnaatitaaffeqarneranut meeqqallu ilinniartinneqarnermik ilinniarnissamillu pisinnaatitaaffeqarneranut ilaatigut tunngapput.
Atuagaq ukiaru saqqummissasoq
Meeqqat illersuisuata, Aviâja Egede Lyngep aningaasaliisoqarnera qujassuteqarfigaa:
- Nunani allani nunat inuii nunatsinnut assingusunik inuiaqatigiinni isumaginninnikkullu ajornartorsiuteqartut ilisimavarput, Aviâja Egede Lynge oqarpoq.
- Taakku aaqqiissutaasinnaasunik nutaanik aamma ujartuipput. MIO-p suleriaasia atorlugu nunani allani meeqqat inuusuttullu atugaat pitsanngorsarneqarsinnaappata tulluusimaarutigalugulu nuannaarutigisariaqarparput.
Atuagaq kalaallisut tuluttullu 2021-mi ukiakkut saqqummersinneqassaaq.
