Sila: Allanngoriartulerpoq – nunarput anorlerlunilu nittaassaaq
Poorskimi sila seqinnarinneranik ilisarnaateqarpoq, tamannalu suli taamaakkallalaassaaq.
Nunali putsileriartorpoq, Nuummiillu avannamut Ilulissat tikillugu siaruariartussaaq. Taama DMI KNR-imut paasissutissiivoq.
- Pingasunngorneq sisamanngornerlu aamma sisamanngornermiit tallimanngornermut sineriak pujortuarallassaaq, aamma Ittoqqortoormiit nalaa putsilissaaq, DMI-mi silasiortuni pigaartoq Ida Petersen oqarpoq.
Anori kissartoq isugutattorlu avataata imartaaniit nunatsinnukaarnerata pujoqalersikkaa Ida Petersen erseqqissaavoq. Immap nillertuunerata anori nillusarmagu pujoqalersippaa.
Illoqarfinni taakkunani maanna kiaganilu isseqanngeriarlutik 14-it tikillugit issilersinnaapput, kujataanili Paamiunilu kiannerulaarsinnaalluni. Ulluunerani sisamat arfineq-pingasullu akornanni kiattarsinnaavoq.
Sapaatip-akunnerani sila imaassasoq
Nunap annersaata massakkut silaqqinnera DMI-p paasititsissutigaa. Naqitsiniisaffilli Newfoundlandip kangianiit nunatsinnut ingerlaarpoq.
Tassa ulluni tulliuttuni siallissangatinneqarpoq, masannartuliussangatinneqarlunilu nittaassangatinneqarpoq, tamanna nunap kujataata kangiata ilaani anorsarissisarneranik kinguneqassaaq.
Tassa Qaanaaq minillugu illoqarfiit tamakkerlugit sapaat tikillugu nittaattarsinnaavoq.
Sila atoruminaatsoq sisamanngornermi Tasiilamut siaruassaaq anorsarissisinnaalluni, arfininngornermut unnukkut kitaata sineriaanut Ittoqqortoormiinullu nittaallilaarsinnaavoq, sapaammiillu ataasinngornermut anorsarissisinnaalluni.
Sapaatip-akunnerata tulliani kiassiut allanngungaassangatinneqanngilaq. Nunattali kujataani Paamiunilu nillernerulaalissaaq.
Seqineq ilupaarutilik
Poorskimi kiannera aamma tupinnartumik ilaqarpoq. Arlalinnit seqerngup avataatigut halomik taaneqartartumik nigalilik alutorsaatigineqaqaaq.
Tamanna kianneranik pilikkajuttoq, silaannarmi qullasissumi aputip ulloriaasannguinit pisarnera pissutaasoq, DMI-mit oqaatigineqarpoq.
Seqerngup aputip ulloriaasanngui qinngoraangagit seqineq ilupaarutinittarpoq – ilaatigullu arlalinngorsinnaasarlutik.
