Aleqap partiit siulittaasui kikkulluunniit oqaloqatigerusuppai
Naalakkersuisut siulittaasuat tusagassiorfinnut oqaaseqartartuni aqqutigalugu maanna tutsiuppoq, Aleqa Hammondillu Jens B. Frederiksenimik oqaloqateqarusunnginnerminut tunngatillugu kingumut qiviallattaasupilussuuvoq.
-Issittumi Siunnersuisooqatigiinnut tunngatillugu oqallittoqassappat, isumaqarpunga politikeritut akisussaasutut susassaqarfimmullu naalakkersuisutut inissisimasimasimasut partiinillu assigiinngitsunit marlunneersut akornanni oqallittoqassappat pissusissamisoornerussasoq. Oqallinnissaq sioqqutilaarlugu paasitinneqarpunga Kuupik napparsimalluni pisinnaajunnaarsimasoq, Issittumilu Siunnersuisooqatigiinnut tunngatillugu suliaq pillugu Qanoruumi oqallisigissagipput sapaatit akunnerata siuliani isumaqatigiissutigereersimallutigu, taamaammat isumarpunga politikeri USPU-mi ataatsimiinnernut paasissutissiiffiusunut peqataasimanngitsorluunniit ataatsimiititaliamilu ilaasortaanngitsoq oqalliseqatigissagukku uggornartuusoq. Kuupiup peqqissippat ataatsimeeqatiginissaa utaqqisinnaallugu erseqqissumik oqaatigaara, aamma suliaq pillugu oqaloqatiginissaa qilanaarivara, taassumami 2011-miilli qinersisoqarnissaata tungaanut tamanna akisussaaffigimmagu, Aleqa Hammond e-mailkkut taama allappoq.
Aleqa Hammondilli suliaq pineqartoq pillugu partiit allat siuttuinik siunissami oqaloqateqarnissaminut ammanerarpoq, tamannali tv-kkut kikkunnut tamanut ammasumik ingerlanneqassanngilaq.
-Suliaq manna pillugu, partiit siuttui USPU-mut ilaasortaanngitsut allat assingalugit, Jens B. Frederiksenimik oqaloqateqarnissara aamma ammaffigaara. Taamaammat, pisariaqarsorineqassappat, taanna partiillu siulittaasui allat ilanngullugit itisiliiffiunerusumik paasissutissiiffiusumut ataatsimiinnissamut qaaqqorusuppakka, Aleqa Hammond neriorsuivoq.
