Aleqap nammineq aningaasaqarnikkut soqutigisani pinnagit nunatta karsiata ammasumik saqqummiunneqarnissaa kissaatigineruaa

Taamaaliornerali Siumukkormiunut ileqqunngulernersoq suli oqaatigiuminaappoq.

Innuttaasut Inatsisartut nittartagaanni qinikkat aningaasarsiornermikkut sunik soqutigisaqarnersut qimerluuataarsinnaavaat. Inatsisartunngorlaat marsimi qinerneqartut pillugit paasissutissat juunip qaammataani ikkussuunneqassapput.

Anders Meilvangip, inuiaqatigiinni peqquserluttuliortarnerup pinaveersaartinnissaa pillugu suliniaqatigiiffimmersup, tassa  Transparency Greenlandimeersup, neriuutigaa politikerit soqutigisaminnut saqqummiussinissaminnut periarfissaminnik atorluaanerunissaat, tassami Inatsisartuni ilaasortani 31-usuni qulingiluat kisimik periarfissaq tamanna maannamut atorsimammassuk.

- Soqutigisamik avammut saqqummiunneqarnissaannik periarfissaq, qinikkat taamaallaat affaasa missaat ukiut kingulliit marluk atorsimavaat. Siumullu sinnerlugit ilaasortat periarfissaq tamanna ataatsimut isigalugu atorsimanngikkaat, ajoraluartumik takusinnaavarput. Siumullu Naalakkersuinermi maanna siuttunngornikuummat tamanna pillugu oqallittoqartariaqartoq isumaqarpugut. Naalakkersuinikkummi sulinermi ammanerusoqarnissaa, Siumup ilaatigut qineqqusaarutigaa, Transparency Greenlandip siulittaasua, eqqartuussissuserisorlu, Anders Meilvang oqarpoq.

Siumukkormiulli saqqumilaarnissaminnut periarfissamik mattussisimanerarlugit Anders Meilvangip oqarnera Siumup siulittaasuata Aleqa Hammondip ilisarisinnaanngilaa:

- Isumaqanngilanga una mattussinertut isigineqassasoq. Isumaqarpunga nalinginnaasumik piumasaqaataanngitsumik neqeroorutaanera inuit nammineerlutik aalajangissagaat atorluarusunnerlugu imaluunniit atorluarusunnginnerlugu. Uani apeqqutaanngilaq isummamut isumaqataanersoq isumaqataannginnersorluunniit. Ataqqisassaavoq innuttaasut taakkua atorniarunikku atussagamikku, Aleqa Hammond oqarpoq.

Taamaattorli Siumup siulittaasuata neriuutigaa aningaasarsiornikkut soqutigisanik saqqummiussisarnerup ileqqunngornissaa:

- Isumaqanngilanga taasissutaasariaqartoq. Isumaqarpunga siulittaasoqarfiup nalinginnaasumik innersuussutigissappassuk, inatsisartunullu tamanna atuutsinneqassappat, soorunami Inatsisartoqarfiup tamanna pingaarnersiuinermini ilanngutissavaa. Isumaqarpungalu taasisoqanngikkaluartoq siulittaasoqarfimmi aallartitatsinninngaanniit tamanna paaseqatigiiffiusinnaasoq, Aleqa Hammond oqarpoq.

Inatsisartut siulittaasortaavata Lars-Emil Johansenip ullumi nalunaarutigaa, Inatsisartuni sulinermi saniatigut inuussutissarsiutitigut ingerlatani assigiinngitsut Inatsisartut nittartagaanut saqqummiunniarlugit aalajangerluni - tamatumalu saniatigut inuussutissarsiutit aallutani tamaasa qimanniarlugit.

Naalakkersuisooqatigiissimasut siuliisa nalaanni, Aleqa Hammondip Aatsitassanut Naalakkersuisuusimasoq Inuit Ataqatigiinnersooq Ove Karl Berthelsen aamma Kuupik Kleist matoqqasumik pissuseqarnerarlugit isornartorsiortarsimavai. Taamanikkut Siumumit ernummatigineqarpoq Inuit Ataqatigiinni ilaasortat taakkua marluk, aatsitassarsiorfimmik Greengems-imik aallussinerat ima annertutigisoq tatiginassusiat innarlerneqarsimalluni.

Kisianni tassa suli nalunarpoq Lars-Emil Johansen Siumukkormioqataasa malillugu paasissutissanik ilioraaniarnersut:

- Isumaqarpungalu inuiaqatigiinni inuit ataasiakkaat kisiisa aallaavigalugit paasissutissanik saqqummiinissaq kisimi pissusissamisuunngitsoq. Isumaqarpunga pissusissamisoornerussasoq inuiaqatigiit aningaasaataasa qanoq ingerlaavarnerat nikerarnerallu, aammalu qanoq atorneqarneranut tunngatillugu paasissutissiisarneq ammanerusoq tamanillu iserfigineqarsinnaasoq soqutiginarnerusoq, Aleqa Hammond oqarpoq.

Inatsisartunut qinigaaqqammersut inuussutissarsiutitigut soqutigisatik saqqummiunniarunikkit sapaatit-akunneri marluk suli periarfissaraat.