Aleqa: Kiisami taamaasiorput
Kuupik Kleistip siuttuunini kiisami takutikkaa, Siumup siulittaasuata, Aleqa Hammondip oqaatigaa - illuatungaatigullu aamma oqaatigalugu, Ove Karl Berthelseni siulittaasuminit inissinneqartoq.
- Isumaqarpunga maannakkumut inuiaqatigiit malinnaatinneqarnerannik Naalakkersuisut siulittaasuata oqariartuuteqarnera pitsaasuusoq, tassami ukiut pingasut matunma siornali tamanna anguniarnialerlugu oqaatigisareermassuk, Naalakkersuisut tusagassiortunik tallimanngormat katersortitsinerminni oqariartuutaat pillugit Siumup siulittaasua, Aleqa Hammond taama oqarpoq.
Tusagassiortunik katersortitsinermi oqaatigineqarpoq neriorsuutigineqarluni, aatsitassarsiornerup qanoq ingerlanneqarneranut inuiaqatigiit peqataatinneqarnerusariaqartut, taamaaliornissamilu suleqatigiissitamik pilersitsinikkut tamanna anguniarneqassasoq.
Ilanngullugu Naalakkersuisut oqaatigaat, suliffeqarfissuit tusarniaatitsinerisa inerneri piaartumik kikkunnut tamanut saqqummiunneqartalissasut.
Naalakkersuisullu neriorsuutigaat, Aatsitassanut Pisortaqarfiup oqartussaaffii, ilaatigut avatangiisit misissorneqartarnerannut tunngasut allanut suliakkiutigineqassasoq.
Tusarniaatitsisarnerni inuiaqatigiit peqataatinneqarnerulernissaannik Naalakkersuisut pilersaaruteqalernerat, Kalaallit Nunaanni Sulisitsisut Peqatigiiffiata tamanna pillugu nalunaarusiortuanit, Sara Aaaenimit nuannaarutigineqarportaaq.
- Inuiaqatigiinnik tusarniaatitsisarnerit pillugit suleqatigiissitamik pilersitsisoqarnissaa ilorraap tungaanut aallariarneruvoq. Neriuutigaaralu tamanna kinguneqarluarluni allannguinernik nutaanik tunngaviliisuujumaartoq, Sara Aaen oqarpoq.
Ingerlatsivissuit pilersinneqalernerini tusarniaatitsisarnerit pillugit nalunaarusiortoq, Kalaallit Nunaanni Sulisitsisut Peqatigiiffiannit, Sara Aaen oqarpoq. Nalunaarusiamini ujartorpaattaaq, pisunut inuiaqatigiinnut ammanerunissaq. Nuannaarutiginerarlugulu politikerit maanna tamanna pillugu pilersaarusiulernerat.
- Inuiaqatigiit akornanni oqallisaanera sivisuumik ingerlasimavoq, politikkikkulli qisuariarfigineqarsimanani. Maannali qisuariarfigineqalerunarluni, tamannalu nuannaarutissaavoq, Aleqa Hammond oqarpoq.
Tusagassiortunik tallimanngormat katersortitsisoqarnerani Naalakkersuisut siulittaasuata, Kuupik Kleistip peqataanera, Aleqa Hammondip nuannaarutigalugu oqaatigaattaaq.
- Isumaqarpungalu Naalakkersuisut siulittaasuata akulerunneratigut, aatsitassaqanermut tunngasut ammanerusumik oqallisaalernissaat anguneqartoq, aammalu paasivarput Naalakkersuisut siulittaasuata naalakkiutai Ove Karl Berthelsenip malittariaqalerai, Aleqa Hammond oqarpoq.
- Ove Karl Berthelsenimut Naalakkersuisut siulittaasuata inaaliinera isumaqarpunga pissusissamisoortoq. Siumumiillu pingaartipparput Naalakkersuisut tamarmiullutik ammasumillu inuiaqatigiinnut ammasumik peqataatitsillutillu politikkeqarnissaat, Aleqa Hammond oqarpoq.
Aatsitassanut Pisortaqarfiup akisussaaffiisa ilaasa allanut suliakkiutigineqartarnissaannut akissaqartoqanngitsoq, Ove Karl Berthelsen Qanoruumut sisamanngormat oqarpoq. Naalakkersuisullu siulittaasuat, Kuupik Kleist tallimanngormat oqarluni, Pisortaqarfiup akisussaaffiisa ilaasa allanut suliassanngortinnissaannut atatillugu, ukiamut Inatsisartut ataatsimiilerpata inatsissap allannguutissaanik eqqarsalereerlutik.
